Тошкентнинг «Локомотив» клуби ва Ўзбекистон ёшлар терма жамоаси футболчиси Лазизбек Мирзаев Испаниянинг Ла Лигасида қатнашувчи «Леганес» клуби билан шартнома имзолади. Бу ҳақида «Локомотив» клуби матбуот хизмати хабар берди.
Шартнома тафсилотлари очиқланмаган. Маълумотларга кўра, Мирзаевнинг «Локомотив» билан амалдаги шартномаси 2025 йилнинг 31 декабригача бўлган. Ҳозирча 18 ёшли яримҳимоячи «Леганес»нинг асосий ёки ёшлар жамоасида ўйнашини аниқ эмас.
Лазизбек Мирзаев 2023 йилги U-17 ёшлар ўртасидаги жаҳон чемпионатида Ўзбекистон терма жамоасининг сардори бўлган. Чемпионатнинг 1/8 финалида у Англияга қарши ўйинда (2:1) ҳал қилувчи голни жарима тўпи орқали киритган. Ўзбекистон ёшлар терма жамоаси ушбу мусобақада чорак финалгача етиб бориб, Францияга ютқазган.
Чемпионатдаги муваффақиятли ўйинларидан сўнг, Мирзаев кўплаб скаутларнинг эътиборини тортди. Унинг трансфер қиймати ҳозирги кунда 350 минг евро этиб баҳоланмоқда.
Июнь ойида Chempionat.Asia нашрига берган интервьюсида футболчи турнирдан сўнг агентлари «Леганес» клубининг қизиқиши ҳақида хабар берганини ва кейинчалик шартнома имзолаганини айтган.
2024 йилги Ўзбекистон чемпионатида Мирзаев 14 та ўйинда майдонга тушган, шундан 8 тасида асосий таркибда ўйнаган ва 1 та голли узатмани амалга оширган. Шунга қарамай, уч марта Ўзбекистон чемпиони бўлган «Локомотив» мавсум якунида Суперлигадаги ўрнини йўқотиб, Про-Лигага тушиб кетди.
«Леганес» ҳақида маълумот:
«Леганес» — Испаниянинг Мадрид атрофидаги шу номли шаҳардан чиққан футбол клубидир. Клуб 1928 йилда ташкил этилган. Ўтган мавсумда Ла Лигага йўлланма олган ва бу мавсумда 16 ўйиндан сўнг 17-ўринни эгаллаб турибди (3 ғалаба, 6 дуранг ва 7 мағлубият).
