Давлат активларини бошқариш агентлиги (ДАБА) UzBAT қўшма тамаки корхонасининг устав капиталидаги 2,6% давлат акциялар пакети хусусийлаштирилгани ҳақида хабар берди.
Томонлар Nego биржадан ташқари майдончасида келишувни расмийлаштирдилар. Бир қимматли қоғознинг нархи Марказий банк курси бўйича номинал қиймати $10 га тенг бўлган 121 233,8 сўм акция учун 420 395,78 сўм деб баҳоланди. Британиянинг BAT Uzbekistan Investment компанияси корхонанинг 641 661 та акциясини (умумий сонининг 2,6036% и) қўлга киритди. Сумма 269,75 млрд сўмни ташкил этди.
ДАБА маълумотларига кўра, келишув амалдаги хусусийлаштириш дастури доирасида ва «Акциядорлик жамиятлари ва акциядорлар ҳуқуқларини ҳимоя қилиш тўғрисида»ги қонуннинг 6-моддаси қоидаларига мувофиқ амалга оширилган. Ҳужжатда, хусусан, акциядорлар сони 50 тадан ошмаган тақдирда ва жамият уставида тегишли қоида мавжуд бўлса, сотувчи бошқа акциядорларни акцияларни сотиш нияти тўғрисида хабардор қилиши ва уларга имтиёзли сотиб олиш ҳуқуқини бериши шартлиги белгиланган.
«Давлат акциялар пакети мустақил баҳоловчи ташкилотни жалб қилган ҳолда баҳоланди… УЗБАТнинг хорижий акциядори — BAT Uzbekistan (Investment) Limited (Буюк Британия) компанияси ўзининг имтиёзли ҳуқуқидан фойдаланиш ва акциялар пакетини сотиб олиш ниятини билдирди», — дейилади хабарда.
2025 йил 29 сентябрь куни агентлик ва инвестор ўртасида олди-сотди шартномаси тузилди. Давактивнинг таъкидлашича, олинган маблағлар агентликнинг Хусусийлаштириш жамғармасига, сўнгра республика бюджетига ўтказилди.
Интерактив давлат хизматлари ягона портали маълумотларига кўра, UzBATдаги 2,603728% улуш Давлат активларини бошқариш агентлигига тегишли бўлган. Компаниянинг энг йирик акциядори 97,38% улуш билан BAT ҳисобланади, қолган акциялар корхона ходимлари бўлган 40 та миноритар акциядор ўртасида тақсимланган.
2024 йил якунларига кўра, UzBAT нинг даромади 3,519 трлн сўмни ташкил этиб, ўтган йилга нисбатан 20,1% га ошган. Ялпи фойда 2,22 трлн сўмга етган (+21,5%), операцион фойда эса учдан бир қисмдан кўпроққа — 1,58 трлн сўмгача ўсган.
Бошқа даромадларни ҳисобга олган ҳолда, тамаки компаниясининг соф фойдаси 1,41 трлн сўмни ташкил этиб, бу бир йил аввалгига нисбатан 39,5% га кўп. Компания томонидан тўланган фойда солиғи 224 млрд сўмдан ошган.
2024 йил якунлари бўйича UzBAT акциядорларига 929,21 млрд сўм дивиденд ҳисобланган, бу бир акция учун 37,7 минг сўмга тўғри келади. 2025 йил август ойи охиригача 568,58 млрд сўм, ёки умумий дивидендлар ҳажмининг 61,2% и тўланган.
2024 йилда компания 2,94 трлн сўм кўрсаткич билан мамлакатдаги 8-энг йирик солиқ тўловчи (хусусий компаниялар орасида биринчи) бўлган.
