UzAuto Motors компанияси Рақобатни ривожлантириш ва истеъмолчилар ҳуқуқларини ҳимоя қилиш қўмитаси мурожаатидан сўнг мижозлар билан тузиладиган намунавий шартномаларга ўзгартиришлар киритди. Қўмита қонунчиликка зид бўлган қоидаларни аниқлаган эди. Бу ҳақда қўмита матбуот хизмати хабар берди.
Қўмита UzAuto Motors дилерлик корхоналари томонидан тақдим этилган шартномаларни (8 банд ва 45 кичик бандни ўз ичига олган) ўрганиш давомида қонунчиликка зид бўлган қоидаларни аниқлади. Таҳлил якунлари бўйича компания билан биргаликда шартноманинг 21 та кичик банди қайта кўриб чиқилди.
UzAuto Motors вакиллари иштирокидаги муҳокамалар натижасида 21 та кичик банд қонун нормаларига мувофиқлаштирилди.
Илгари маблағларни қайтариш қўшимча шартнома имзоланган кундан бошлаб 30 кун ичида амалга оширилган. Энди бу муддат 10 кунга қисқартирилди.
Аввалроқ, ишлаб чиқаришдаги вақтинчалик узилишлар, ҳатто улар ишлаб чиқарувчига боғлиқ бўлмаса ҳам, етказиб бериш муддатини 45 кунга узайтиришни назарда тутарди. Энди бу банд «форс-мажор» бўлимига ўтказилди.
Бир йил ичида худди шу моделга иккинчи шартнома тузилган тақдирда етказиб бериш муддатини 120 кунга узайтириш имконини берувчи банд ҳужжатдан бутунлай чиқариб ташланди.
Шунингдек, янгиланган шартномада сотувчининг мажбуриятлари қонунчилик талабларига мувофиқ аниқроқ белгилаб қўйилган.
