UzAuto Motors автоишлабчиқарувчисининг 2025 йил биринчи ярмидаги соф фойдаси 1,4 трлн сўмни ташкил этиб, бу 2024 йилнинг шу даврига нисбатан 27,5%га кам. Бу компаниянинг корпоратив ахборотлар порталида эълон қилинган ҳисоботида кўрсатилган.
Таққослаш учун, 2024 йилнинг биринчи ярмида ишлаб чиқарувчи фойданинг 65%га ўсганини (1,9 трлн сўм), 2023 йилнинг шу даврида эса 18,9%га пасайишини (1,16 трлн сўм) қайд этган эди. 2022 йил январь-июнь ойларида компания фойдаси 2 баравар ошиб, 1,78 трлн сўмни ташкил қилган.
Пасайиш асосан биринчи чоракка тўғри келди, унинг якунларига кўра фойда 2 баравар камайди — 1,29 трлн сўмдан 0,64 трлн сўмгача. Иккинчи чоракда компания йўқотишларнинг бир қисмини қоплади: фойда 21%га ўсиб, 749,6 млрд сўмга етди. Бир йил аввал бу кўрсаткич, аксинча, 30%га камайган эди.
Иккинчи чоракда фойданинг ўсиши импорт электромобиллари учун утилизация йиғимининг кескин ошиши фонида юз берди.
Бошқа кўрсаткичлар
UzAuto Motors’нинг 2025 йилнинг 6 ойидаги даромади 21,2 трлн сўмни ташкил этди, бу ўтган йилга нисбатан 9,5%га кам. Ялпи фойда 22,8%га камайиб, 3,4 трлн сўмга тушди.
Таннарх 6,4%га — 17,8 трлн сўмгача пасайди. Сотув рентабеллиги 8,2%дан 6,5%га қисқарди.
Ҳисоботда қарз олиш тузилмасидаги ўзгаришлар ҳам қайд этилган. Узоқ муддатли банк кредитлари 1,8 трлн сўмдан 810,2 млрд сўмгача камайди, шу билан бирга қисқа муддатли қарзлар 224,2 млн сўмдан 1,1 трлн сўмгача ошди.
2024 йил учун ҳисобот
Илгари, 2024 йил учун ХМҲС (Халқаро молиявий ҳисобот стандартлари) бўйича йиллик ҳисобот маълумотларига кўра, UzAuto Motors’нинг соф фойдаси 314,9 млн долларни ташкил этган бўлиб, бу 2023 йилга нисбатан 5,6%га паст. Мижозлар билан тузилган шартномалардан олинган даромад 4,2 млрд долларга, ялпи фойда эса 582,2 млн долларгача камайди.
Ички бозордаги сотувлар компанияга 3,7 млрд доллар даромад келтирди (-8,2%), экспорт эса 494,4 млн долларни ташкил этди (-7%). Хорижий сотувларнинг асосий қисми Қозоғистонга тўғри келди ($436 млн).
2024 йил охири ҳолатига кўра, UzAuto Motors’нинг умумий кредитлари ва қарзлари 432,7 млн долларни ташкил этди, бир йил аввал бу кўрсаткич 460 млн доллар эди. Бу суммага 2021 йилда 5 йил муддатга чиқарилган 300 млн долларлик еврооблигациялар киради.
Бозорда Chevrolet улуши пасайди, ADM Jizzakh ва BYD ўз позицияларини мустаҳкамламоқда
«Ўзавтосаноат» маълумотларига кўра, Ўзбекистон автомобиль бозорида Chevrolet брендининг улуши (2024 йил январь-май ойларида) 90,2%дан (2025 йил январ-май ойларида) 82,2%га тушди. Йиллик ҳисобда сотувлар қарийб 31 мингтага — 142 891 тадан 111 830 тагача камайди.
Cobalt’дан ташқари, барча бошқа моделларнинг (Damas, Tracker ва Onix) сотувлари пасайди. Шунингдек, Lacetti сотуви тўхтатилди, гарчи 2024 йилнинг 5 ойида ушбу моделдан 11,9 мингта сотилган бўлса-да.
Chevrolet сотувлари қисқариши фонида бошқа ишлабчиқарувчилар ўз улушларини оширдилар. Шундай қилиб, ADM Jizzakh ўтган йилги 7,2%га нисбатан бозорнинг 11,4%ни эгалламоқда. Уларнинг асосий бренди Kia сотувлари 56,4%га — 5896 тадан 9224 тагача ўсди, шунингдек, Haval ва Chery автомобилларига талаб ҳам ошгани қайд этилди.
BYD Uzbekistan Factory компанияси ҳам ўз позицияларини кучайтирди: унинг улуши 3,5%дан 5,8%гача ўсди. Бу даврда корхона 39%га кўпроқ автомобиль сотди (5654 тадан 7859 тагача).
2025 йил 26 август куни UzAuto Motors тўла ўлчамли Chevrolet Tahoe йўлтанламасининг янги версиясини тақдим этди, унинг нархи 1,464 млрд сўмни ташкил этади. Компания бош директори Янош Ковач бир қатор моделларнинг янгиланган версиялари тақдимоти тез орада кутилаётганини маълум қилди.
