Uzbekistan Airways компанияси 2026 йилда лизинг бўйича ҳамкори CALC (China Aircraft Leasing Group) компаниясидан иккита янги, тор фюзеляжли Airbus A321neo самолётини қабул қилиб олади. Бу ҳақда ташувчининг матбуот хизмати хабар берди.
Салоннинг янги таркиби
Лайнерлар CALCнинг Airbus’дан тўғридан-тўғри буюртмаси асосида етказиб берилади. Уларнинг ўзига хос хусусияти янги салон таркиби бўлади: Full Flat конфигурацияли 16 та бизнес-класс ўриндиғи ва 156 та эконом-класс ўриндиғи (аввалги таркиб: 16 та бизнес-класс ва 172 та эконом-класс ўриндиғи).
Uzbekistan Airways бошқаруви раиси Шуҳрат Худайқулов янги A321neo самолётларини қабул қилиб олишни «нафақат флотни кенгайтириш, балки замонавий, рақобатбардош ва қулай авиация тизимини яратиш сари муҳим қадам» деб атади.
Замонавий жиҳозлар
Самолётлар Airbus’нинг янги Airspace Premium салон кабиналари билан жиҳозланиши хабар қилинган бўлиб, бу яхшиланган шовқин изоляцияси, кенг багаж бўлими, ўриндиқлар устидаги кенгайтирилган жой ва замонавий LED ёруғликни таъминлайди.
Бортда интернетга кириш имконияти, замонавий кўнгилочар тизим (фильмлар, мусиқа, ўйинлар ва парвоз харитаси), индивидуал экранлардан фойдаланиш мумкин бўлади.
Самолёт хусусиятлари
Airbus A321neo модели юқори ёнилғи самарадорлиги, оширилган парвоз масофаси ва пасайтирилган шовқин даражаси билан ажралиб туради. Бу самолётларни ўрта ва узоқ масофали йўналишлар учун оптимал қилади.
Миллий ташувчи 2022 йилдан бери A321neo самолётларидан фойдаланмоқда. Ҳозирда компания флотида бешта шундай самолёт мавжуд. CALC билан ҳамкорлик 2023 йилда йўлга қўйилган.
