Ўзбекистон Марказий банки эскроу-ҳисобварақлари орқали амалга ошириладиган уй-жой ва автомобиль олди-сотди битимлари бўйича хизматлар учун комиссия тўловларининг энг юқори миқдорларини эълон қилди.
Регулятор тушунтиришига кўра, кўчмас мулк билан боғлиқ операциялар бўйича комиссия базавий ҳисоблаш миқдорининг 50 фоизидан (206 минг сўмгача), автотранспорт воситалари билан боғлиқ битимлар бўйича эса БҲМнинг 25 фоизидан (103 минг сўмгача) ошмаслиги керак.
Агар харидор ва сотувчига битта банк хизмат кўрсатса, комиссия бир марта ундирилади. Турли банкларда хизмат кўрсатилганда эса, ҳар бир банк белгиланган комиссиянинг ярмидан кўп бўлмаган миқдорда ҳақ олишга ҳақли.
Битим бекор қилинган ёки амалга ошмай қолган тақдирда, эскроу-ҳисобварағига жойлаштирилган маблағлар харидорга қайтарилади.
Шу билан бирга, Марказий банк белгиланган максимал комиссиялар фақат давлат иштирокидаги тижорат банкларига тегишли эканлигини аниқлаштирди. Бошқа банкларда тарифлар уларнинг ички сиёсати билан белгиланади.
Эслатиб ўтамиз, 2026 йил 1 апрелдан Ўзбекистонда уй-жой ва автомобиль сотиб олишда ҳисоб-китоб қилиш тартиби ўзгаради. Президент фармонига кўра, битимлар нақд пулсиз шаклга ўтказилади. Пуллар эскроу-ҳисобварағида сақланади ва фақат битим нотариал тартибда расмийлаштирилгандан сўнг сотувчига ўтказиб берилади.