Халқаро «Урганч» аэропортини давлат-хусусий шериклик (ДХШ) асосида модернизация қилиш ва бошқариш бўйича танловнинг барча босқичлари якунланди. Танлов натижаларига кўра, Жанубий Кореянинг Incheon International Airport Corporation компанияси ғолиб деб топилди, деб хабар берди Uzbekistan Airports матбуот хизмати.
Танлов 2024 йил 1 август куни эълон қилинган эди. Саралаш икки босқичда – малакани аниқлаш ва таклифларни қабул қилиш шаклида ўтказилди. Унда 8 та компания иштирок этди, шулардан 5 таси финал босқичига ўтди ва мазкур босқичда идоралараро тендер комиссияси томонидан ғолиб аниқланди.
Uzbekistan Airports маълумотига кўра, хусусий шерик томонидан йўловчи ва юк терминаллари қурилиши ва бошқаруви, шу жумладан, ерда хизмат кўрсатиш таъминланиши лозим. Давлат шериги эса аэродром мажмуасини (учиш-қўниш йўлаги, перрон) қуриш ва бошқариш билан шуғулланади.
Кейинги қадам — 19 йиллик концессия даврини назарда тутувчи ДХШ шартномасини имзолаш бўлади.
«Очиқ тендер эълон қилиниши халқаро аэропорт компаниялари томонидан катта қизиқиш уйғотди. Саралашда ғолиб чиққан Инчхон халқаро аэропорти Корея Республикасининг асосий ҳаво дарвозаси бўлибгина қолмай, балки Шимолий-Шарқий Осиёнинг энг йирик транспорт марказларидан бири ҳисобланади. У бир неча бор дунёдаги энг ривожланган ва энг банд аэропортлар ўнталигига киритилган. 2024 йил якунларига кўра, Инчхон аэропорти 70 миллиондан ортиқ йўловчига хизмат кўрсатган. Биз Урганчдаги лойиҳани амалга оширадиган жамоа Хоразм ҳаво дарвозасини энг замонавий ва қулай йўловчи аэропортлардан бирига айлантиради, минтақага хорижий сайёҳлар учун жозибадорликни оширади ва умуман, Ўзбекистоннинг авиация соҳаси ривожига ҳисса қўшади, деб ишонамиз», — дейилади Uzbekistan Airports изоҳида.
Эслатиб ўтамиз, «Урганч» халқаро аэропортини модернизация қилиш ва бошқариш бўйича давлат-хусусий шериклик лойиҳаси 2024 йил 30 августда қабул қилинган Президент қарорига асосан бошланган ва уни Uzbekistan Airports Транспорт вазирлиги ва Иқтисодиёт ва молия вазирлиги билан ҳамкорликда амалга оширмоқда.
