2026 йилда Ўзбекистон яна Украинадан келган болаларни дам олиш ва соғломлаштириш учун қабул қилишни режалаштирмоқда. Бу ҳақда Украина ташқи ишлар вазири ўринбосари Александр Мишенко 2026 йил 2 апрель куни Тошкентга ташрифи якунлари бўйича журналистларга маълум қилди.
«Ҳозир мен жорий йилда болаларни соғломлаштириш дастури қайта тикланиши ва инсонпарварлик ёрдамининг қайсидир тури бўйича қарор қабул қилиниши ҳақидаги маълумотни эшитдим. Украинани қўллаб-қувватлаётган барчадан миннатдормиз», — деди вазир ўринбосари Ўзбекистон ТИВда ўтказилган учрашув якунлари бўйича.
«Ўзбекистон томонидан [аввалроқ] кўрсатилган инсонпарварлик ёрдами биз учун жуда зарур. Ҳукуматнинг болаларни соғломлаштириш бўйича қарори ҳам умумий ғалабамизга қўшилган катта ҳисса», — деб таъкидлади Александр Мишенко.
Ташқи ишлар вазири ўринбосари Ўзбекистон ТИВдаги учрашувда мамлакатнинг бу ерда яшаётган украин диаспорасига бўлган муносабати учун миннатдорчилик билдирганини айтди.
«Украин диаспораси нормал яшаш, ишлаш, ўзини ижодий баркамол қилиш имкониятига эга», — деди. Бу Россиянинг Украинага босқини бошланганидан кейин келган одамларга ҳам тегишли.
Унинг қўшимча қилишича, Ўзбекистондаги украиналиклар маҳаллий жамиятга интеграциялашиш билан бир вақтда ўз тили ва маданиятини сақлаб қолишда давом этмоқдалар. Унинг сўзларига кўра, бундай ўзаро алоқа маданий жиҳатдан бир-бирини бойитишга хизмат қилади.
«Назаримда, бу икки маданият ва қадимий анъаналарнинг яхши уйғунлигидир», — деб қайд этди Александр Мишенко.
Эслатиб ўтамиз, Ўзбекистон илк бор 2023 йилда Украинадан келган болаларни дам олиш ва соғломлаштириш учун қабул қилган эди. 45 нафар боладан иборат гуруҳ Тошкент вилояти Бўстонлиқ туманидаги оромгоҳда дам олганди.
2025 йилда мамлакат Украинадан 100 нафар бола ва уларга ҳамроҳлик қилувчи педагогларни қабул қилишга муваффақ бўлди. Дастур маҳорат дарслари, экскурсиялар, интеллектуал ўйинлар ва спорт мусобақаларини ўз ичига олган эди. Болалар, шунингдек, Тошкент бўйлаб саёҳат қилишган. Бундан ташқари, Ўзбекистон қайта рейс билан Украинага инсонпарварлик юки — 2000 та «биринчи синф ўқувчиси тўплами»ни юборган эди.