Украина Ташқи ишлар вазирлиги тузилмасида Марказий Осиё билан ишлаш бўйича алоҳида бошқарма ташкил этди ва минтақа мамлакатлари билан ҳамкорликни сезиларли даражада фаоллаштириш ниятида. Бу ҳақда Украина ташқи ишлар вазири ўринбосари Александр Мишенко 2026 йил 2 апрель куни Тошкентга ташрифи якунлари бўйича журналистларга маълум қилди.
«Мен Ўзбекистонга, ундан олдин эса Қозоғистонга Украина ТИВнинг Марказий Осиё давлатлари билан муносабатларни сезиларли даражада фаоллаштириш тўғрисидаги қарори муносабати билан келдим», — деди вазир ўринбосари.
Сафар давомида унга Украина ТИВнинг Марказий Осиё мамлакатлари билан алоқалар бўйича махсус вакили, Украинанинг Қозоғистондаги элчиси Виктор Майко ҳамроҳлик қилди.
Тошкентда Украина делегацияси Ўзбекистон ташқи ишлар вазирининг биринчи ўринбосари Баҳромжон Аълоев билан музокаралар ўтказди. Томонлар икки томонлама кун тартиби ва ҳамкорлик истиқболларини муҳокама қилдилар.
«Мен ТИВ раҳбариятига ва бутун мамлакатга Украинанинг ҳудудий яхлитлиги ва суверенитетини қўллаб-қувватлашдаги қатъий ҳамда принципиал позицияси учун миннатдорчилик билдирдим. Биз учун бу ҳар қандай мамлакат билан икки томонлама муносабатларни белгиловчи асосий масала», — деб таъкидлади Александр Мишенко.
Унинг сўзларига кўра, Ўзбекистон ва Украина «халқаро ҳуқуқ тамойилларига таянади» ва бу масалада томонларнинг позициялари «мутлақо бир хил».
Ўзбекистон ва Украина ўртасидаги Украина ТИВ вакилларининг Тошкентга ташрифи билан амалга оширилган сўнгги сиёсий маслаҳатлашувлар 2021 йилда бўлиб ўтган эди. Александр Мишенко муносабатларнинг ҳозирги фаоллашувини Киевнинг минтақа билан ишлашдаги ёндашуви ўзгаргани билан изоҳлади.
У Украина Марказий Осиёни яхлит минтақа сифатида кўришини ва унинг барча мамлакатлари билан дипломатик ишларни мувофиқлаштиришга урғу бераётганини таъкидлади.
«Биз бир нечта давлатлар билан сизлар Марказий Осиё доирасида амалга ошираётган лойиҳаларни бирлаштиришни истардик», — деди Александр Мишенко. Унинг сўзларига кўра, Киев минтақанинг халқаро шериклар билан мавжуд бўлган ҳамкорлик формати — С5+1 га таянмоқда.
«Масалан, Марказий Осиё — АҚШ, Марказий Осиё — ЕИ, Марказий Осиё — Озарбайжон форматлари мавжуд. Биз ушбу халқаро иштирокчиларнинг барчасининг стратегик шериги сифатида бунга қўшилмоқчимиз», — деди.
Ушбу ёндашув доирасида Украинанинг минтақадаги дипломатик ваколатхоналарида кадрлар сиёсати қайта кўриб чиқилмоқда, дея қўшимча қилди вазир ўринбосари.
«Нима учун Ўзбекистонда ҳозирча Украина элчиси йўқ? Биз Ўзбекистонга шу қадар жиддий қараймизки, шунчаки кимнидир тайинлай олмаймиз. Шунинг учун жиддий саралаш кетмоқда. Талаб катта, рақобат бор. Ўйлайманки, вазир ва президент барча элчихоналаримизни тўлдириш учун ҳозир бу масалани ҳал қилмоқдалар», — деди.
ТИВ раҳбари ўринбосари Ўзбекистон ислоҳотлар ва жадал ривожланиш босқичини ўтаётгани сабабли ҳозирги вақт ҳамкорликни кенгайтириш учун қулай эканини таъкидлади.
Александр Мишенко алоқаларнинг фаоллашиши Ўзбекистон ва Украина шериклигини янги босқичга олиб чиқишга имкон беришига ишонч билдирди.