Футбол бўйича Ўзбекистон ёшлар терма жамоаси 23 ёшгача бўлган футболчилар ўртасидаги Осиё кубогида муваффақиятли старт олди ва гуруҳ босқичининг илк ўйинида Ливан жамоасини 3:2 ҳисобида мағлуб этди. C гуруҳидаги учрашув 2026 йил 7 январь куни бўлиб ўтди.
Ҳисоб 24-дақиқадаёқ очилди — Амирбек Саидов гол муаллифига айланди. Танаффусдан сўнг Равшан Хайруллаев (50-дақиқа) ўзбекистонликларнинг устунлигини мустаҳкамлади, 57-дақиқада эса Сардорбек Баҳромов учинчи тўпни киритди.
Ливанликлар 65 ва 90+5-дақиқаларда Леонардо Шоҳиннинг голлари билан жавоб қайтаришди.
Статистикага кўра, Ўзбекистон жамоаси ишончлироқ кўринди: дарвоза томон зарбалар 17 га 10, аниқ зарбалар 6 га 4, тўпга эгалик қилиш бўйича ҳам кичик устунлик — 53% га 47%.
C гуруҳидаги биринчи турдан сўнг Ўзбекистон терма жамоаси 3 очко жамғариб, +1 тўплар нисбати билан турнир жадвалида якка пешқадам бўлиб олди. Эрон ва Корея Республикаси жамоалари ўзаро дуранг (1:1) ўйнашди ва бир очко ҳамда ноль тўплар нисбати билан иккинчи-учинчи ўринларни бўлишиб турибди. Ливан терма жамоаси Ўзбекистондан учралган мағлубиятдан сўнг тўртинчи ўринни эгаллаб турибди ва ҳозирча очко жамғармаган.
Гуруҳ босқичида Ўзбекистон терма жамоасини Эрон ва Корея Республикасига қарши ўйинлар кутмоқда, улар мос равишда 10 ва 13 январь кунлари бўлиб ўтади.
Турнир ҳақида
U-23 Осиё кубоги 2026 йилнинг 6 январидан 24 январигача Саудия Арабистонида бўлиб ўтмоқда. Очилиш ўйинида турнир мезбонлари Қирғизистонни 1:0 ҳисобида мағлуб этди, А гуруҳида эса Вьетнам терма жамоаси Иорданиядан устун келди — 2:0. B ва C гуруҳларидаги ўйинлар 7 январь куни ўтказилди.
Турнирда 16 та терма жамоа иштирок этмоқда, 2003 йил 1 январда ва ундан кейин туғилган футболчилар иштирок этиш ҳуқуқига эга. Саралаш босқичи 2025 йилнинг сентябрь ойида бўлиб ўтган эди.
Амалдаги мусобақа турнир тарихидаги сўнгги ноолимпия турнири бўлади — кейинги циклдан бошлаб U-23 Осиё кубоги ҳар тўрт йилда бир марта ўтказилади. Амалдаги чемпион Япония ҳисобланиб, у 2024 йилги турнир финалида Ўзбекистонни мағлуб этган эди.
Ливан U-23 терма жамоаси учун бу турнир тарихдаги биринчиси бўлди. Жамоа саралаш босқичининг F гуруҳида Малайзияни мағлуб этиб (1:0), Таиланд билан дуранг ўйнаб (2:2) ва Моғулистонни тор-мор келтириб (3:0) финал босқичига йўл олди.
Ўзбекистон терма жамоаси турнирга жиддий тарихий ютуқлар билан келди: сўнгги тўртта мусобақанинг учтасида жамоа финалгача етиб борган, бир марта чемпион бўлган ва икки марта кумуш медалларни қўлга киритган. Сўнгги турнир, шунингдек, Ўзбекистонга олимпия йўлланмасини тақдим этган эди.
Бу галги мусобақада Ўзбекистон шарафини асосан 19-21 ёшли футболчилар ҳимоя қилмоқда ва турнирдаги иштирок кейинги олимпия циклига тизимли тайёргарлик босқичи сифатида қаралмоқда.
Жамоа бош мураббийи Равшан Ҳайдаров турнир бошланишидан олдин Осиё кубоги футболчилар учун катта футболга қадам бўлиши кераклигини таъкидлаган эди.