Ўзбекистон туғруқхоналарида коррупцияга қарши кураш кучайтирилди — виждоний ёндашув қўлланилмоқда ва очиқлик сиёсати юритилмоқда. Бу ҳақда 2026 йил 20 февраль куни «Ўзбекистон — 2030» стратегиясига бағишланган матбуот анжуманида соғлиқни сақлаш вазири Асилбек Худоёров маълум қилди.
Унинг сўзларига кўра, давлат туғруқхоналарида коррупциянинг олдини олишга алоҳида эътибор қаратилмоқда.
«Туғруқхоналар бўйича биз коррупцияга қарши кураш, қаттиқ кураш олиб боряпмиз. Виждоний ёндашув, тартиб, превентив усулларни қўллаяпмиз ва очиқлик сиёсатини юритяпмиз», — деди.
Соғлиқни сақлаш тизимидаги ислоҳотлар доирасида ҳукумат «тиббиётни халққа яқинлаштириш» чораларини кўрмоқда.
«Тошкентда ва чекка ҳудудларда, туманларда туғруқ мажмуалари бор. Уларда оддий туғруқлар бепул амалга оширилади. Агар асоратлар кузатилса, туғруқ махсус йўлланма ва имтиёзли ордер асосида вилоят ёки Республика марказида ўтказилади — бу эҳтимолий асоратларни олдиндан кўриш ҳамда она ва бола ҳаётини сақлаб қолиш учун қилинади. Кесарево кесиши амалиёти фақат ҳаётий кўрсатмалар бўйича ўтказилади», — деди Худоёров.
Вазир, шунингдек, юқори даражадаги туғруқ мажмуаларига йўлланма бериш тартибини тушунтириб ўтди.
«Агар яшаш жойи бўйича тайёр туғруқ мажмуаси бўлса, фуқаролар у ерда бепул туғишлари мумкин. Агар улар оддий физиологик туғруқни бошқа муассасада, масалан, республика даражасидаги шифохонада ўтказишни хоҳлашса, яшаш жойидан йўлланма берилади. У ерда сифатли қабул таъминланади», — деди.
Асилбек Худоёров Тошкентнинг Олмазор туманида хусусий туғруқ мажмуаси очилганини, у ерда хизматлар пуллик асосда кўрсатилишини қайд этди. «У пуллик. Хоҳловчилар у ерда пуллик ёки ўз туғруқ мажмуаларида бепул туғишлари мумкин», — деди вазир.
Соғлиқни сақлаш вазирлиги раҳбари Республика муассасалари ва Республика она ва бола саломатлиги марказининг ҳудудий филиаллари мураккаб туғруқлар ҳамда оғир ҳолатларни юритиш учун мўлжалланганини таъкидлади.
«Агар уларни оддий физиологик туғруқлар билан тўлдириб юборсак, оғир аҳволдаги беморни қабул қилиш имконияти бўлмай қолиши мумкин», — деди.
Вазир жамиятда «кесарево кесиши ҳақида саволлар кўп» эканини айтди.
«Шифокорлар бу операцияни пул учун қилишмайди. У ҳаётий кўрсатмалар бўйича — она ва бола ҳаётини сақлаб қолиш учун бажарилади. Агар гап режали операция ҳақида кетаётган бўлса ва аёл йўлланмасиз хусусий ёки юқори даражадаги муассасага мурожаат қилмоқчи бўлса, буни пуллик асосда амалга ошириши мумкин. Давлат кафолатлари доирасидаги режали ва шошилинч тиббий ёрдам бизда бепул кўрсатилади», — деди Худоёров.
Аввалроқ вазир коррупцияга қарши курашиш учун «тизим раҳбарлари ва уларнинг жамоаларида бу иллатга қарши туриш истаги бўлиши керак»лигини таъкидлаган эди. У, шунингдек, кўп ҳолларда пора берувчи шахс жазосиз қолаётганини айтиб, ўз жамоаси коррупцияга қарши курашишга тайёрлигини билдирганди.
2025 йил январь ойида вазир Осиё тараққиёт банкининг 100 млн доллар маблағи ҳисобидан Ўзбекистон бўйлаб 230 та туғруқхона учун 45 турдаги 21 минг дона тиббий жиҳоз ва 6 та реанимобиль сотиб олинишини маълум қилганди.