АҚШ ва Украина президентлари Дональд Трамп ва Владимир Зеленский 2025 йил 28 декабрь куни Флоридада музокаралар ўтказди. Трампнинг Мар-а-Лаго шахсий қароргоҳида делегациялар учрашуви тахминан уч соат давом этди. Унинг якунларига кўра, ҳар икки президент уруш тез орада якунланиши борасида оптимизм билдирди, бироқ айрим масалалар ҳал этилмай қолаётганини тан олди, деб ёзади NBC News.
Трампнинг сўзларига кўра, тинчлик битими яқин, томонлар шартларнинг тахминан 95 фоизини келишиб олган. «95 фоизни [қамраб олдик] дейиш мумкин, лекин мен фоизларда гапиришни ёқтирмайман. Мен шунчаки ҳаммаси жуда яхши кетаётган деб ўйлайман, — деди. — Битта ёки иккита жуда мураккаб, жуда қийин масала бор, лекин мен ҳаммаси жуда яхши кетаётган деб ҳисоблайман. Бугун биз катта тараққиётга эришдик».
Зеленский ушбу баҳога қўшилди. «Бизда ҳақиқатан ҳам ажойиб мулоқот бўлди, — деди Украина президенти журналистларга. — Биз тинчлик битимининг барча жиҳатларини муҳокама қилдик».
У 20 та банддан иборат келишув 90 фоизга тайёрлигини ва АҚШ ҳамда Европа томонидан хавфсизлик кафолатлари «деярли келишиб олинганини» қўшимча қилди.
Трамп тинчлик битимини имзолаш муддатлари ҳақида гапирар экан, Украина ва Россия имзолашга «ҳар қачонгидан ҳам яқинроқ» эканини ва унинг фикрича, жараён «бир неча ҳафта» вақт олишини қайд этди.
«Ўйлайманки, биз буни уддалаймиз. Қачонлигини айтмоқчи эмасман, лекин менимча, биз буни қиламиз», — деди.
Журналистларнинг ҳал этилмаган масалалар ҳақидаги саволига Трамп бу «ер» эканини айтди: Россия Украинадан Донбасс шарқидаги ҳали эгаллаб олинмаган ҳудудларни беришни талаб қилмоқда.
«Сиз айтаётган ернинг бир қисми аллақачон босиб олинган. Ернинг бир қисми эса кейинги ойлар давомида эгалланиши мумкин», — деди АҚШ президенти ҳудудлар бўйича келишувга иложи борича тезроқ эришиш яхшироқ эканини таъкидлаб. У Украина «катта жасорат кўрсатганини… ва [душманга] катта зарар етказганини», бироқ низога «нуқта қўйиш вақти келганини» айтди.
Зеленский Донбасс масаласи ҳали ҳам максимал даражада долзарблигини ва Украинанинг бу борадаги позицияси «аниқ ҳамда Россияникидан фарқ қилишини» тасдиқлади.
Украина президенти ҳозир муҳокама қилинаётган тинчлик битимининг исталган банди референдумга ҳам, мамлакат парламенти кўриб чиқишига ҳам олиб чиқилиши мумкинлигини қўшимча қилди.
Украина учун «барқарор тинчликка эришиш йўлидаги асосий босқич» хавфсизлик кафолатлари эканини Зеленский алоҳида таъкидлади.
У Украина жамоаси келишувнинг барча бандлари устида ишлашни давом эттиришини ва яқин ҳафталарда муҳокама қилинган барча масалаларни якунлаш учун Европа Иттифоқи ва НАТО вакиллари билан учрашувлар ўтказишини маълум қилди.
Зеленский билан учрашувдан бир неча соат олдин Трамп Truth Social ижтимоий тармоғида Россия президенти Владимир Путин билан гаплашганини ва суҳбатни «яхши ва жуда маҳсулдор» деб атаганини маълум қилди.
Журналистларнинг Путин Украина тинчлик шартномаси бўйича референдум ўтказиши учун вақтинчалик ўт очишни тўхтатишга рози бўлдими, деган саволига Трамп шундай жавоб берди: «Йўқ, сулҳ эмас. У [Путин] шундай деб ҳисоблайдики… Қаранг, улар урушяпти ва тўхташи керак, кейин агар улар яна бошлашига тўғри келса, бу эҳтимолдан холи эмас, у бундай вазиятга тушиб қолишни хоҳламайди. Мен бу позицияни тушунаман».
Яқин келажакда АҚШ, Украина ва Россия ўртасида уч томонлама учрашув бўлиши мумкинми, деган саволга Трамп: «Менимча, ҳа… Муносиб вақтда… Путин бу амалга ошишини хоҳлайди. У менга буни жуда аниқ айтди, мен унга ишонаман», — деб жавоб берди.