Дания Бош вазири Метте Фредериксен АҚШ президенти Дональд Трампни Гренландияни эгаллаб олиш билан таҳдид қилишни тўхтатишга чақирди, деб хабар бермоқда Reuters.
«Қўшма Штатлар Гренландия устидан назорат ўрнатиши зарурлиги ҳақида гапириш мутлақо бемаънилик. АҚШ Дания қироллиги таркибига кирувчи учта ҳудуднинг бирортасини аннексия қилиш ҳуқуқига эга эмас», — деб баёнот берди Фредериксен якшанба куни.
Унинг баёноти Трамп The Atlantic журналига берган интервьюсида Гренландияни АҚШга қўшиб олиш истагини яна бир бор билдирганидан сўнг янгради.
«Гренландия бизга ҳақиқатан ҳам керак. У бизга мудофаа учун зарур», — деди Трамп АҚШнинг НАТО бўйича иттифоқчиси Даниянинг бир қисми бўлган оролни «Россия ва Хитой кемалари билан ўралган» деб таърифлаб.
Америка президенти ушбу баёнотни АҚШ 2026 йил 3 январь куни Венесуэлага қарши йирик ҳарбий операция ўтказиб, президент Николас Мадуро ва унинг рафиқасини қўлга олгани ҳамда уларни Нью-Йоркка олиб келганидан бир кун ўтиб қилди.
The Atlantic журналининг Венесуэлага қилинган ҳужум Қўшма Штатлар Гренландия устидан куч ишлатиш орқали назорат ўрнатишга тайёрлигини англатадими, деган саволига Трамп буни бошқалар баҳолашини айтди.
Трампнинг сўзлари Данияда худди шундай сценарий Гренландия билан ҳам содир бўлиши мумкинлиги ҳақидаги хавотирларни келтириб чиқарди, деб қайд этади Reuters.
«Шу боис мен АҚШни тарихан яқин иттифоқчисига, шунингдек, сотилмаслигини аниқ билдирган бошқа мамлакат ва бошқа халққа нисбатан таҳдидларни тўхтатишга қатъий чақираман», — деди Фредериксен.
Гренландия Бош вазири Йенс-Фредерик Нильсен ҳам Трампнинг сўзларига муносабат билдирди.
«Америка Қўшма Штатлари президенти «бизга Гренландия керак» деб айтганида ва бизни Венесуэла ҳамда ҳарбий интервенция билан боғлаганида, бу шунчаки нотўғри эмас. Бу ҳурматсизлик», — деди.
21 декабрь куни Дональд Трамп Луизиана губернатори Жефф Лэндрини Гренландия бўйича махсус вакил этиб тайинлади. Ушбу қарор Дания ва Гренландия томонидан танқидга учради. Лэндри Трампнинг АҚШ Арктика оролини назорат қилиши зарурлиги ҳақидаги ғоясини ошкора қўллаб-қувватлайди.
