АҚШ Олий суди президент Дональд Трампнинг 1977 йилдаги миллий миқёсдаги фавқулодда ҳолатлар учун мўлжалланган федерал қонун асосида жорий этган бир томонлама божларига қарши қарор чиқарди, деб хабар беради Reuters.
Олий суд судьялари 6 га 3 овоз билан президент ўз тарифларини жорий қилишда ушбу қонунни қўллаш орқали ваколатларини суиистеъмол қилган деб топди.
«Президент чекланмаган миқдор, муддат ва ҳажмдаги тарифларни бир томонлама жорий этиш учун фавқулодда ваколатларга эга эканини даъво қилмоқда… Ушбу даъво қилинган ваколатларнинг конституциявий контекстини ҳисобга олсак, у уларни амалга ошириш учун Конгресснинг аниқ рухсатини кўрсатиши керак», — деди Олий суд раиси Жон Робертс судьялар номидан сўзлаб. Суд фикрига кўра, Трамп таянишга ҳаракат қилган фавқулодда ваколатлар қонун талабларига жавоб бермайди.
Ушбу қарор ўтган йил давомида бир неча бор президент томонини эгаллаб келган Олий судда Трампнинг ҳозирги маъмурияти дуч келган энг йирик мағлубият бўлди, деб қайд этади CNN.
Олий суддаги суд жараёни оғзаки эшитувлар учун бирлаштирилган учта алоҳида даъводан иборат эди. Даъволардан бири ўйинчоқлар ишлаб чиқарувчи Learning Resources оилавий компанияси томонидан берилган. Яна бир даъвони жамоатчилик манфаатларини ҳимоя қилиш билан шуғулланувчи Liberty Justice Center юридик фирмаси бир гуруҳ кичик корхоналар номидан киритган. Учинчи даъвони АҚШнинг 12 та штати: Аризона, Колорадо, Коннектикут, Делавэр, Иллинойс, Мэн, Миннесота, Невада, Нью-Мексико, Нью-Йорк, Орегон ва Вермонт берган.
Қуйи инстанция судлари Трамп фақат миллий фавқулодда ҳолатларда фойдаланиш учун мўлжалланган қонун асосида божлар жорий этиб, ўз ваколатлари доирасидан чиққани ҳақида қарор чиқарганидан сўнг иш Олий судгача етиб борди.
2025 йил апрель ойида Трамп АҚШнинг деярли барча хорижий савдо шериклари товарларига «ўзаро» божлар жорий этиш учун Халқаро фавқулодда иқтисодий ваколатлар тўғрисидаги қонунни (IEEPA) қўллаган эди. Худди шу қонунга таяниб, у Хитой, Канада ва Мексикага қарши тарифлар киритганди.
АҚШ Молия вазири Скотт Бессент ва Трамп маъмуриятининг бошқа вакиллари аввалроқ Қўшма Штатлар иложи борича кўпроқ божларни сақлаб қолиш учун бошқа ҳуқуқий асослардан фойдаланишини айтишган эди.