Тошкент марказида ўз собиқ хотини билан бирга 4 кишини қасддан юқори тезликда босиб кетган 27 ёшли эркакка нисбатан безорилик ва қасддан одам ўлдиришга суиқасд моддалари билан жиноят иши қўзғатилди. Бу ҳақда пойтахт ИИББ матбуот хизмати хабар берди.
ИИББ маълумотларига кўра, 01Н014FC давлат рақамли Chevrolet Tracker автомобили рулида Б. Р. (тўлиқ исми кўрсатилмаган) бўлган. Жиноят 2026 йил 26 март куни туш пайтида Ниёзбек йўли кўчасида юзага келган низодан сўнг содир этилган. Кузатув камерасига тушган кадрларда ҳодисадан аввал бошқа шахслар иштирокида икки эркак муштлашаётганини кўриш мумкин.
Кўчада кетаётган одамлар урилиш оқибатида ҳавога ирғиб кетган. Расмий маълумотларга кўра, ҳайдовчининг собиқ хотини ва унинг таниши енгил тан жароҳати олган ва шифохонага ётқизилган.
Юнусобод тумани прокуратураси Ўзбекистон Жиноят кодексининг 25 ва 97-моддалари (қасддан одам ўлдиришга суиқасд), шунингдек, 277-моддаси (безорилик) билан жиноят иши қўзғатди.
Пойтахт ИИББ ЙҲХБ ҳолат бўйича ҳар томонлама ва холис тергов ўтказилишини ҳамда қонуний қарор қабул қилинишини ваъда қилди. Иш ИИВ, ИИББ ва прокуратура раҳбарияти назоратида.