Тошкентдаги ижтимоий объектларда марказлашган иситиш 2025 йил 3 ноябрдан, турар жойларда эса 5 ноябрдан бошланиши эълон қилинди. Пойтахт ҳокими ушбу қарорни гидрометеорология хизмати маълумотларини ҳисобга олган ҳолда қабул қилди. Бу ҳақда шаҳар ҳокимлиги матбуот хизмати хабар берди.
Қайд этиш жоизки, белгиланган тартибга кўра, ташқи ҳавонинг ўртача суткалик ҳарорати кетма-кет 5 кун давомида Цельсий бўйича +8 даражадан паст бўлгандан кейин иситиш даври бошланиши керак. Бу йил ҳокимлик яна бундай даврни кутмади. Аввалроқ амалдаги қоидани бекор қилиш масаласи бир неча бор кўтарилган эди.
Ўзгидромет 3 ноябрь, душанба кунидан бошлаб Ўзбекистоннинг шимолий туманларига, 4-6 ноябрь кунлари эса республиканинг бутун ҳудудига совуқ ва нисбатан нам ҳаво массаси кириб келишини хабар қилган эди. 3-5 ноябрь кунлари баъзи жойларда ёмғир ёғади, тоғолди ва тоғли ҳудудларда қорга айланади. 4-6 ноябрь кунлари ҳаво ҳарорати аста-секин пасайиб, кечаси 0…+3 даражагача, баъзи жойларда совуқ тушиши мумкин, кундузи эса +8…+13 даражагача бўлади.
2025 йил 12 ноябрдан бошлаб Тошкентда иситиш ва иссиқ сув учун янги тарифлар кучга киради. Аҳоли учун нарх 15%га, юридик шахслар учун 40%га, бюджет ташкилотлари учун эса 19%га ошди.
