Тошкентда турар-жой биноларига ичимлик сувини ҳисобга олиш ва назорат қилиш бўйича «ақлли» ускуналарни оммавий ўрнатиш бошланмоқда, деб хабар беради «Тошкент шаҳар сув таъминоти» компанияси.
Ҳисоблагичларни ўрнатиш президентнинг 2022 йил 18 ноябрдаги қарори билан тасдиқланган «Тошкент шаҳар ичимлик суви таъминоти ва канализация тизимларини трансформация қилиш» лойиҳаси доирасида амалга оширилмоқда.
Лойиҳа «Ўзсувтаъминот» компанияси томонидан Франциянинг Suez компанияси билан ҳамкорликда амалга оширилмоқда.
«Лойиҳанинг мақсади — ичимлик суви истеъмолини назорат қилиш ва мониторинг қилиш учун рақамли технологияларни жорий этиш. Эски русумдаги ҳисоблагичлар ҳам истеъмолчилар, ҳам сув етказиб берувчи учун ноқулайликлар туғдирар эди: кўрсаткичларни маълумотлар базасига ўз вақтида тақдим этмаслик туфайли тўлов пайтида тушунмовчиликлар юзага келарди. Бундан ташқари, истеъмолчилар ўз сув истеъмоли ҳақидаги маълумотларга кириш имконига эга эмас эдилар», — дейилади хабарда.
Шайхонтоҳур туманининг бир нечта нуқталарида муваффақиятли пилот синовларидан сўнг, ҳисоблагичларни оммавий ўрнатиш жорий йилнинг учинчи чорагида пойтахтнинг Янгиҳаёт туманидан бошланади. Кейинги беш йил давомида «Тошкент шаҳар сув таъминоти» АЖ ҳисобидан 670 минг нафар жисмоний шахс-абонентга «ақлли» ҳисоблагичлар бепул ўрнатилади.
Янги ҳисоблагичлар радиомодуллар билан жиҳозланган бўлиб, улар сув сарфи, сизиб чиқишлар, техник носозликлар ва ташқи аралашув уринишлари ҳақидаги маълумотларни реал вақт режимида узатиш имконини беради. Маълумотлар автоматик равишда биллинг тизимига келиб тушади, истеъмолчилар эса шахсий кабинет орқали сув сарфини онлайн кузатишлари ва мобил иловалар ёрдамида хизматлар учун тўловларни амалга оширишлари мумкин бўлади.
Май ойида «Технопарк» компанияси (унинг улуши Тошкент ҳокимлигига тегишли, аммо корхонанинг ўзи бошқа хусусий компаниянинг ишончли бошқарувида) AKFA BUILD компанияси Австриянинг Diehl Metering компанияси билан Osten сув ҳисоблагичларини ишлаб чиқаришни бошлаганини хабар қилган эди. Роликда тақдим этилган ҳисоблагичларда Osten ва Diehl логотипларини кўриш мумкин. «Тошкент шаҳар сув таъминоти» ҳисоблагичлар «Технопарк» томонидан ишлаб чиқарилишини маълум қилди.
2020 йил бошидан буён «Технопарк» Osten товар белгиси остида газ смарт-ҳисоблагичларини ишлаб чиқармоқда. «Технопарк» компаниясининг электрон сув ҳисоблагичлари ишлаб чиқариш режалари 2021 йил бошида маълум бўлган эди.
«Тошкент шаҳар сув таъминоти» хабар беришича, ҳисоблагичлар пайвандлаш ёки сантехника ишларини талаб қилмайди, фақат эски ускуна алмаштирилади. «Сиздан фақат мутахассисларнинг хонадонга киришига рухсат бериш талаб қилинади. Ҳисоблагичларни ўрнатиш билан боғлиқ барча саволлар бўйича маҳаллангизда ташкил этиладиган вақтинчалик штабларга мурожаат қилишингиз мумкин», — дейилади хабарда.
Ишлаб чиқарувчи беш йиллик кафолат беради. Носозлик юзага келган тақдирда, хизмат кўрсатиш шартларига мувофиқ таъмирлаш бепул амалга оширилади.
Шартнома суммаси ва ҳисоблагичларнинг нархи ошкор этилмаяпти.
Эслатиб ўтамиз, Уй-жой коммунал хизмат кўрсатиш вазирлиги, Тошкент шаҳар ҳокимлиги, «Тошкент шаҳар сув таъминоти» МЧЖ ва SUEZ International SAS (Франция) компанияси ўртасида 2020 йил 7 мартда «Тошкент шаҳар ичимлик суви таъминоти ва канализация тизимларини трансформация қилиш» лойиҳаси бўйича 7 йил муддатга қўшма бошқарув шартномаси имзоланган. Унинг қиймати 218,8 млн еврога баҳоланмоқда (Европа банкларининг кредит маблағлари — 154,5 млн евро, Ўзбекистон улуши — 64,3 млн евро).