Тошкентнинг Яшнобод туманида криптовалюталарнинг ноқонуний айланмаси билан шуғулланган гуруҳ қўлга олинди. Бу ҳақда Ўзбекистон ИИВ Киберхавфсизлик маркази хабар берди.
Идора маълумотларига кўра, «Хавфсиз кибермакон» тадбири доирасида қўлга олинган шахслар криптовалюталарнинг ноқонуний айланмаси орқали пулларни легаллаштиришда айбланмоқда.
Шубҳалилар Ўзбекистон қонунчилигида тақиқланган қимор ва хавфли ўйинларни ташкил этган хорижий компанияларга техник ва молиявий ҳамкорликни тақдим этиб, белгиланган тартибни четлаб ўтган ҳолда молиявий операцияларни амалга ошириш учун Decent онлайн платформасидан фойдаланган.
Киберхавфсизлик маркази 2025 йил январь ойидан август ойигача бўлган даврда 180 миллиард сўмдан ортиқ суммада криптовалюталар билан ноқонуний операцияларни амалга оширганини аниқлади.
ИИВ Тергов департаменти томонидан ЖКнинг 278-8-моддаси 3-қисми «а» ва «в» бандлари (криптовалюталар айланмаси соҳасидаги қонунчиликни ташкиллашган гуруҳ томонидан яширинча, жуда катта миқдорда бузиш) билан жиноят иши қўзғатилди.
Ашёвий далиллар сифатида 38 тадан ортиқ уяли телефон ва 1000 га яқин пластик карталар олиб қўйилди. Тергов ҳаракатлари давом этмоқда.