Ўзбекистон транспорт вазири Илҳом Маҳкамов «Ўзбекистон 24» телеканалига берган интервьюсида Тошкентда янги халқаро аэропорт қурилиши жойи ва яқин келажакда амалга оширилиши режалаштирилган йирик инфратузилма лойиҳалари ҳақида сўзлаб берди.
Унинг сўзларига кўра, янги аэропорт қурилиши учун ер участкаси пойтахтнинг жанубида, Сергели туманидаги мавжуд халқаро аэропортдан 17 км узоқликда танланган. Объект Тошкент вилоятида жойлашади.
«Участка Тошкентни Самарқанд билан боғлайдиган мавжуд автомобиль йўлига, шунингдек, бўлажак Тошкент – Самарқанд автомагистрали маршрутига яқин жойлашган. Яъни, қурилиш ривожланган транспорт ва логистика инфратузилмаси мавжуд жойда режалаштирилган», — деди вазир.
Шу билан бирга, Тошкент – Самарқанд пуллик автомагистрали лойиҳаси бўйича ишлар олиб борилмоқда. Транспорт вазирлиги раҳбарининг сўзларига кўра, узоқ вақт давомида халқаро танлов ўтказилган ва унинг натижаларига кўра ғолиб аниқланган.
«Биз бу ҳақда муҳтарам Президентимизга ҳисобот бердик. Ҳозир тендер ғолиби билан музокараларга ўтмоқдамиз. Ушбу музокаралар натижасида шартнома имзоланади ва бу йилнинг ўзида қурилиш ишларини бошлаймиз», — деди у компания номини ошкор қилмасдан.
Шундай қилиб, вазир таъкидлаганидек, иккита йирик лойиҳа — Янги Тошкентда янги халқаро аэропорт ва Тошкент – Самарқанд автомагистрали қурилиши «яқин вақт ичида» амалга оширила бошланади.
У шунингдек, Тошкент ва Чорвоқ ўртасида янги йўл қурилиши лойиҳаси ҳақида ҳам гапириб берди.
Тошкент-Самарқанд пуллик йўли ҳақида
Транспорт вазирлиги раҳбари февраль ойида Тошкент ва Самарқанд ўртасида пуллик трасса қурилишини 2025 йилда бошлаш режалари ҳақида сўзлаб берган эди. Гап умумий узунлиги 300 км бўлган олти полосали йўл ҳақида кетмоқда.
«Барча лойиҳа ҳужжатлари якунлангандан сўнг биз тендер ўтказмоқдамиз. Ушбу лойиҳа бўйича қурилиш ишлари ҳам бу йилга режалаштирилган. Муҳтарам Президентимиз тендерни барча қоидаларга риоя қилган ҳолда, лекин ортиқча вақт сарфламасдан, бу икки йўл бўйича қурилишни тезроқ бошлаш вазифасини қўйди», — деди.
2024–2030 йилларга мўлжалланган давлат-хусусий шерикликни ривожлантириш тўғрисидаги қарорга мувофиқ, ўтган йил декабрь ойида пудратчи аниқланиб, у билан шартнома тузиш ва қурилишни бошлаш режалаштирилган эди. Ишларни 2028 йил охиригача якунлаш, сўнгра бошқарувни ДХШ асосида хусусий операторга топшириш режалаштирилган. Тошкент-Самарқанд йўлининг тахминий қиймати 2,2 млрд долларни ташкил этади.
