Тошкентга хориждан учиб келган йўловчиларни тез орада халқаро аэропортнинг тартибсиз автотураргоҳи эмас, балки «цивилизациялашган хизмат кўрсатиш шароитлари»га эга бўлган майдон кутиб олади.
Uzbekistan Airports компанияси матбуот хизмати кўп йиллардан бери ўзбекистонликларнинг норозилигига ва туристларнинг ҳайратига сабаб бўлиб келаётган вокзалолди майдонида режалаштирилаётган ўзгаришлар ҳақида хабар берди.
2024 йил ноябрида бошланган келиш залини кенгайтириш ишлари ҳақида хабар берилган эди. Унда жўнаб кетиш залида қилинганидек, бино фасади олдинга сурилган. 2025 йил июнь ойида ниҳоят, терминал ичида кутиб олувчилар учун зона пайдо бўлди ва автотранспорт ҳамда автобуслар учун кириш йўлаги қурилди.
Компания маълумотларига кўра, бу кириш йўлаги фақат туристик автобуслар ва аэропортнинг расмий таксилари учун қолдирилади. Бунда аукцион орқали бюджетдан тортиб комфорт ва бизнес-классгача бўлган турли нарх тоифаларида ишлайдиган бир нечта лицензияланган операторларни жалб қилиш режалаштирилган.
Кутиб олувчиларнинг автомобиллари ва такси агрегаторлари учун 10 дақиқагача бепул кириш имконини берувчи иккинчи йўлак очилади. Вақт лимитидан ошиш камералар орқали қайд этилади. Шу каби (аммо охиригача автоматлаштирилмаган) тизим жўнаб кетиш залининг тўхташ жойида амал қилади.
«Келиш зонасидаги ҳолат яхши эмаслигича қолмоқда: тартибсиз автотураргоҳ, ноқонуний ташувчилар ва доимий тирбандликлар йўловчилар ва кутиб олувчилар учун жиддий ноқулайликлар келтириб чиқармоқда», — дея тан олди Uzbekistan Airports.
«Реконструкция тартиб ўрнатиш, транспорт оқимларини аниқ ажратиш ва цивилизациялашган хизмат кўрсатиш шароитларини яратишга қаратилган», — дея қўшимча қилди компания.
Аэропорт ишини тўхтатмасдан амалга оширилаётган реконструкция жараёни икки босқичга бўлинган.
Биринчи босқичда, октябрь охиригача якунланиши керак бўлган, иккита кириш йўлаги ва 330 ўринли автотураргоҳ, шу жумладан тез зарядлаш станцияларига эга жойлар фойдаланишга топширилади.
Иккинчи босқичда эса, жўнаб кетиш ва келиш залларини бирлаштириш ҳисобига, қурилиш техникаси учун қолдирилган йўлак ҳисобига кириш йўлакларини узайтириш ва кенгайтиришрежалаштирилган.
