Тошкентнинг Яккасарой туманида профилактика инспектори тўққиз қаватли уйнинг томидан сакрамоқчи бўлган 15 ёшли қизни қутқарди, дея хабар берди чоршанба (2025 йил 23 июль) куни ИИББ матбуот хизмати.
Эрта тонгда (тахминан соат 6:40 да) маҳаллада ўрнатилган «ташвиш тугмаси»дан сигнал олингач, навбатчи қисм ҳодиса жойига ходимларни юборган.
Гуруҳ бошида бўлган Яккасарой тумани ИИБ бошлиғи Мухтор Аҳмедовнинг айтишича, профилактика инспектори Санжар Бекмуродов томга чиққан, ўзи эса бошқа ходимларнинг ишини мувофиқлаштириш учун пастда қолган.
Инспектор квартиралардан бирининг балкони орқали ўсмир қизга бир неча метр масофага яқинлашган. ИИБ ходими ёрдам келгунча 30 дақиқа давомида қиз билан суҳбатни давом эттира олган.
Унинг айтишича, қиз стресс ҳолатида бўлган ва агрессив хатти-ҳаракат қилган. Суҳбат давомида инспектор қизга яқинлашиб, иккаласи ҳам йиқилиб тушмаслиги учун тўғри туриб олган.
Ён қўшни подъезддан томга чиққан бошқа ИИБ ходими ҳамкасбига камар узатган. Инспектор қизни осонроқ ушлаб туриш учун уни камар билан ўраган. Қизни парапетдан томга кўтариш учун арқон керак бўлган.
Санжар Бекмуродовнинг сўзларига кўра, у қизни 15 дақиқа давомида маҳкам ушлаб турган. Қиз бир неча марта чиқиб кетишга уринган.
ФВВ ходимлари етиб келгач, арқон ташлаганлар ва унинг ёрдамида ўсмирни қутқаришган. Кейин ИИБ ходимлари қизни ота-онасига топширишган.
ИИББ ота-оналарни фарзандларига эътиборли бўлишга ва улар билан ишончли мулоқот қилиш муҳимлигини таъкидлади.
