Давлат тиббиёт муассасалари 2026 йил 1 апрелдан бошлаб беш кунлик иш ҳафтаси графиги бўйича ишлай бошлади, деб хабар берди Ўзбекистон Соғлиқни сақлаш вазирлиги матбуот хизмати.
Дам олиш ва байрам кунлари мутахассислар навбатчилик графиги асосида фаолият юритадилар.
Соғлиқни сақлаш вазирлиги иш фаолиятини ташкил этишнинг вақтинчалик тартиби тўғрисидаги буйруқни тасдиқлади, унга кўра 1 апрелдан бошлаб тиббиёт ходимларининг иш вақти ҳафтасига 36 соатдан ошмайди.
Зарарли ва хавфли шароитларда ишлайдиган ходимлар учун иш вақтининг қисқартирилган давомийлиги қўлланилади. Юқори руҳий-эмоционал ва ақлий юклама билан боғлиқ ишлар учун ҳам ҳафтасига 36 соатлик чегара белгиланган.
Шу билан бирга, тиббий ходимлар тоифасига кирмайдиган ходимлар учун иш вақти ҳафтасига 40 соатни ташкил этади.
Поликлиникаларда қуйидаги иш тартиби ўрнатилди:
- душанбадан жумагача — соат 8:00 дан 20:00 гача;
- шанба куни — соат 8:00 дан 14:00 гача (навбатчилик).
Соғлиқни сақлашнинг янги модели жорий этилган ҳудудларда:
- асосий иш вақти — соат 8:00 дан 16:00 гача;
- қўшимча навбатчилик — соат 16:00 дан 20:00 гача.
«Иш ҳақи сақлаб қолинади ва қисқартирилмайди. Ички ҳужжатлар ва меҳнат шартномалари қайта расмийлаштирилиши лозим. Стационарларда навбатчиликлар доимий асосда ташкил этилади. Сменалар ва навбатчиликлар адолат тамойили асосида тақсимланади», — деб хабар берди Соғлиқни сақлаш вазирлиги.
Эслатиб ўтамиз, 5 кунлик иш ҳафтасига ўтиш президентнинг 2025 йил 9 ноябрдаги тиббиёт ва фармацевтика ходимларини қўллаб-қувватлаш тўғрисидаги қарорида кўзда тутилган эди.