Ўзбекистон Республикаси Президенти Шавкат Мирзиёев 2025 йил 8 сентябрь куни ToshTech Техника университетини ташкил этиш тўғрисидаги қарорни имзолади.
Давлат олийгоҳи Олий таълим, фан ва инновациялар вазирлиги томонидан, Boston Consulting Group (АҚШ) компаниясининг консалтинг кўмаги билан Тошкент давлат техника университети (ТДТУ) негизида ташкил этилмоқда.
2029 йил охиригача ТДТУ бино ва иншоотлари босқичма-босқич реконструкция қилиниб, ToshTech’га топширилиши, 2030 йилдан бошлаб эса ТДТУ ўз фаолиятини тўхтатиши кутилмоқда.
Қарорга кўра, олийгоҳ мамлакатда ривожланаётган саноат тармоқлари учун «намунавий» ва «халқаро таълим стандартларига мос муҳандис кадрларни тайёрлаш» маскани бўлиши керак.
«Бизнинг стратегик вазифамиз — энг юқори халқаро стандартларга жавоб берадиган янги авлод университетини яратиш. Биз замонавий меҳнат бозорининг энг юқори талабларига жавоб берадиган муҳандислар етиштириладиган экотизимни шакллантирамиз», — деган эди май ойида Президент ёрдамчиси, ҳозирда Президент Администрацияси раҳбари Саида Мирзиёева.
ToshTech’да бакалавриат йўналишларида ўқиш 2026 йилдан, магистратура ва олий таълимдан кейинги таълим йўналишларида эса 2027 йилдан бошланади. 2025 йилда эса давлат бюджети ҳисобидан молиялаштириладиган бир йиллик тайёрлов курси (foundation) очилади.
Ўқув жараёни ўзбек ва хорижий тилларда олиб борилади. Талабалар давлат грантлари асосида ҳам, контракт асосида ҳам қабул қилинади. Бунда 2029–2030 ўқув йилигача қабул қилинган барча талабалар фақат давлат гранти асосида таҳсил олади.
ToshTech’даги таълим йўналишлари: муҳандислик, энергетика, аппарат инженерияси (hardware engineering), сунъий интеллект, механика инженерияси, электроника, автоматлаштириш инженерияси, нефть ва газ, геологоразведка ва тоғ-металлургия. Дастурлар хорижий олийгоҳлар билан ҳамкорликда ишлаб чиқилади.
Олийгоҳнинг Васийлик кенгашига Бош вазир ўринбосари, Иқтисодиёт ва молия вазири Жамшид Қўчқоров раҳбарлик қилди. Унинг таркибига Олий таълим, фан ва инновациялар вазири Қўнғиротбой Шарипов, Энергетика вазири Жўрабек Мирзамаҳмудов, Президент ҳузуридаги Стратегик ривожланиш агентлиги директори Баҳодир Раҳматов ва бошқалар ҳам киритилди. Кенгашга хорижий мутахассисларнинг ҳам жалб этилиши кутилмоқда.
Ҳукумат Адҳам Юсупович Худайқуловни ToshTech ректори этиб тайинлади. У бунга қадар Президент Администрацияси ҳузуридаги Таълим сифатини назорат қилиш миллий агентлиги директори лавозимида ишлаган.
2024 йил июнь ойида Президент Ўзбекистоннинг ҳар бир ҳудудида техника олийгоҳи ва муҳандислик мактабларини ташкил этишни топширган эди. Жами 35 та олийгоҳни йириклаштириш ҳисобига 22 та техника университети очилиши режалаштирилган.
Халқаро бошқарув консалтинги компанияси Boston Consulting Group Ўзбекистонда 2017 йилдан бери ишлаб келмоқда, 2022 йилдан эса Тошкентда ўз офисига эга. Компания тоғ-кон, нефть-газ, кимё, транспорт-логистика ва қишлоқ хўжалиги соҳаларида қатор лойиҳаларни амалга оширган.
