2025 йил 30 июль куни тахминан соат 16:09 да, Бодой ва Беруний станциялари оралиғидаги 592-километр қўриқланмайдиган темир йўл кесишмасида йўл-транспорт ҳодисаси содир бўлди, дея хабар берди «Ўзбекистон темир йўллари» компаниясининг матбуот хизмати.
Дастлабки маълумотларга кўра, «КамАЗ» русумли юк машинаси йўл ҳаракати қоидаларини эътиборсиз қолдириб, Андижон—Қўнғирот йўналишида келаётган йўловчи поезди олдидан ўтишга уринган.
Ҳодиса машинанинг поезд таркиби билан тўқнашувига олиб келган, натижада тепловоз рельсдан чиқиб кетган. Бироқ, компаниянинг таъкидлашича, тўқнашувда ҳеч ким жабрланмаган.
Воқеа жойига тезкор гуруҳ авариядан кўп ўтмай етиб келиб, ҳодиса сабабларини ўрганмоқда.
«Темир йўлчилар тезкор чоралар кўришди ва поезднинг барча йўловчилари олтита автобусда Нукус ва Қўнғиротга жўнатилди», дея таъкидлади компания.
