Ўзбекистондаги мобил операторлар Рақамли технологиялар вазирлиги билан ҳамкорликда сохта рақамлардан бўлган қўнғироқларни блоклайдиган, телефон фирибгарлиги ва шахсий маълумотларнинг сизиб чиқишидан ҳимоя қиладиган anti-spoofing технологиясини жорий этганини маълум қилди.
Бу ҳақда 2025 йил 17 октябрь куни Beeline, 21 октябрь куни эса Mobiuz хабар берди. Рақамли технологиялар вазирлиги ушбу технологияни барча операторлар жорий этаётганини маълум қилди. Ушбу функция барча абонентлар учун автоматик равишда ишлайди ва бепул тақдим этилади.
«Антиспуфинг» тизими рақамнинг ҳақиқийлигини текширади: агар хориждан келаётган қўнғироқ Ўзбекистондаги ҳақиқий фойдаланувчидан эмас, балки маҳаллий рақам (+998 префиксига эга) ниқобланган рақамдан бўлса, тизим уни блоклайди, дейишди Beeline компаниясида.
Ўзбекистон мобил операторларининг роумингдаги рақамларидан келаётгандек туюладиган қўнғироқлар ҳам ўтказилмайди. Тизим SIM-картали қурилманинг аслида қаерда жойлашганини текширади ва агар абонент уй тармоғида рўйхатдан ўтган бўлса, қўнғироқ автоматик равишда блокланади.
Хабарда айтилишича, бу янгилик Рақамли технологиялар вазирлиги ташаббуси ва кўмагида амалга оширилаётган телефон фирибгарлигига қарши курашиш бўйича кенг кўламли дастурнинг бир қисмидир.
Mobiuz компанияси anti-spoofing технологияси 2025 йил сентябрь ойидаёқ жорий этилганини ва хориждан келадиган телефон фирибгарларининг қўнғироқлари бир ойдан бери абонентларга етиб бормаётганини маълум қилди. Роботлаштирилган қўнғироқларни автоматик блоклаш тизимлари ҳам жорий этилган.
«Тизим қўнғироқларнинг ҳақиқийлигини автоматик равишда текширади ва абонентга қўнғироқ келишидан олдин гумонли уланишларни блоклайди», — дея қайд этишди компанияда.
