Ўзбекистон ФВВ Tashkent City ҳудудида жойлашган Park in Mall оилавий савдо-кўнгилочар маркази фаолиятини тўхтатди. 2026 йил 15 март куни марказнинг учинчи қаватидаги хоналардан бирида ёнғин содир бўлган эди.
ФВВ вакилининг маълум қилишича, ёнғин электр жиҳозларидаги носозлик туфайли келиб чиққан. Хабар соат 13:18 да келиб тушган. Ўт ўчириш экипажлари бир дақиқа ичида етиб келган ва оловни тез фурсатда (10 дақиқадан кам вақт ичида) бартараф этган. Воқеа жойида ФВВ раҳбарияти бўлган.
Ёнғин натижасида жабрланганлар йўқ. Олов 25 кв. м майдонга зарар етказган.
Ёнғин содир бўлган хонада таъмирлаш ишлари олиб борилаётган бўлган. Тўртинчи қаватда эса фудкорт ва болалар майдончаси жойлашган эди. Ижтимоий тармоқларда тарқалган видеоларда қаватлар бўйлаб тутун тарқалаётгани ва одамлар ёш болалари билан бинодан югуриб чиқаётгани акс этган.
Ёзувларда сигнализация овози эшитилмайди ва ёнғинни ўчириш тизими ишлаётгани кўринмайди.
Бинода қатор камчиликлар, қоидабузарликлар ва талаб даражасида амалга оширилмаган тадбирлар аниқланди. Вазирлик асосий камчилик сифатида хоналарни ижарага олган тадбиркорлар томонидан электр симларидан нотўғри фойдаланилганини қайд этди. Ёнғин ҳам тахминан шу сабаб билан боғлиқ бўлган.
Савдо марказининг бутун биноси аниқланган камчиликлар тўлиқ бартараф этилгунга қадар ёпилди, деб хабар берди ФВВ.
Тошкент шаҳар ФВБ аввалроқ Park in Mall мажмуаси ҳали фойдаланишга топширилмаганини маълум қилган эди. Шунга қарамай, унда бир неча ойдан бери дўконлар, умумий овқатланиш шохобчалари, кинотеатр ва фитнес маркази фаолият юритиб келган.
Эслатиб ўтамиз, 2026 йил 31 январь куни пойтахтдаги Aviator савдо марказининг болалар майдончасида содир бўлган йирик ёнғиндан сўнг (ўшанда икки ёшли қизча вафот этган эди), ФВВ бутун мамлакат бўйлаб шу каби объектларда ёнғин хавфсизлиги талабларига риоя этилишини текширишни бошлаган эди. Айрим объектлар иши тўхтатиб қўйилганди.