2024 йил май ойидан, Ўзбекистонда энергия ресурслари тарифлари оширилганидан то ўтган йилнинг декабрь ойигача, электр энергияси истеъмоли 2023 йилнинг худди шу даврига нисбатан 10,6%га камайди. Бу 1,3 млрд кВт·соат тежамкорликка тенг, деб ҳисоблади Президент Администрацияси ҳузуридаги Иқтисодий тадқиқотлар ва ислоҳотлар маркази (ИТИМ) экспертлари.
Марказ янги тариф сиёсати шароитида энергия ресурслари истеъмолини ўрганиш бўйича тадқиқот ўтказди, унда бутун мамлакат бўйлаб 3516 та хонадон иштирок этди. Шунингдек, 3,5 миллион газ абоненти ва 8 миллион электр энергияси абонентининг истеъмоли ҳақидаги маълумотлар таҳлил қилинди.
Тадқиқот маълумотларига кўра, илгари ойига 10 минг киловатт-соатдан ортиқ истеъмол қилган хонадонлар сони камайган. 2023 йилда бундай хонадонлар қарийб 80 мингта бўлган бўлса, 2024 йилда уларнинг сони 5 баравардан кўпроққа камайиб, 15 мингтани ташкил этди.
Ойига 200 кВт·соатгача истеъмол қилувчи абонентлар улуши барқарор бўлиб қолди — 2023 йилда 71%, 2024 йилда эса 72%.
Табиий газ истеъмолида ҳам шунга ўхшаш тенденциялар кузатилмоқда: 2024 йилда абонентларнинг 58% ойига 500 куб метргача истеъмол қилган, 2023 йилда эса — 54%.
«Шундай қилиб, тарифнинг ошиши базавий истеъмол ҳажмларида кескин ўзгаришларга олиб келмади», — дея хулоса қилади ИТИМ экспертлари.
