Сурхондарё вилояти Олтинсой туманида 3 июль куни ўлим билан боғлиқ йўл-транспорт ҳодисаси содир бўлди, дея хабар берди вилоят ИИБ матбуот хизмати.
2006 йилда туғилган ёш йигит ҳайдовчилик гувоҳномасига эга бўлмай туриб, Lacetti русумли автомобиль рулига ўтирган. Тахминан соат 22:30 да у 4 нафар дўсти билан бирга Шўрчи туманидан Олтинсой томон йўл олган. Соат 23:40 атрофида, 75B 012 автомобиль йўлининг 15-километрида машина бетон устунга бориб урилган.
2 нафар йўловчи олган тан жароҳатлари туфайли воқеа жойида вафот этган. Яна 2 нафари туман тез тиббий ёрдам бўлимига ётқизилган, бироқ кейинроқ вафот этган. Ҳайдовчининг ўзи ҳам жароҳат олган ва шифохонада.
Ҳайдовчининг сўзларига кўра, автомобиль унинг танишига тегишли бўлган, у машинани тахминан 200 метр узоқликда жойлашган автоювиш шохобчасига олиб боришни сўраган. Йўлда у дўстларини учратиб қолган ва улар «айланишга» қарор қилишган.
Йигит уйда ҳайдашни ўрганганини, оиласида ўзининг Gentra автомобили борлигини таъкидламоқда. Авария содир бўлган куни у бошқа автомобилни қувиб ўтмоқчи бўлган, лекин шу пайт руль ён томонга бурилиб кетган. Машина йўлдан чиқиб кетиб, юқори тезликда бетон устунга бориб урилган.