Ўзбекистон Бош вазири Абдулла Арипов Чимкентда бўлиб ўтган Digital Qazaqstan 2026 халқаро форумида мамлакатда спутник интернетини ишга тушириш режалари ҳақида гапириб берди, деб хабар қилди тадбирнинг бош медиа ҳамкори Digital Business нашри.
Ҳукумат раҳбарининг сўзларига кўра, янги технологиянинг жорий этилиши бориш қийин бўлган ҳудудларни алоқа билан таъминлаш имконини беради.
«Охирги 9 йил ичида Ўзбекистон сезиларли ютуқларга эришди: кенг полосали интернет қамрови 41 фоиздан 99,5 фоизгача ўсди, тармоқнинг ўтказувчанлик қобилияти эса 40 баравар ошди. Биз бориш қийин бўлган туманларни улаш вазифасини ҳал қилмоқдамиз — жорий йилнинг ўзидаёқ спутник интернетини синовдан ўтказиш режалаштирилган бўлиб, унинг операторлари учун солиқ имтиёзлари пакети шакллантирилган», — дея Абдулла Ариповнинг сўзларидан иқтибос келтиради нашр.
Ўзбекистон Бош вазири, шунингдек, сунъий интеллектнинг миллий инфратузилмасини шакллантириш учун йирик ҳисоблаш кластерини ёйиш ишлари якунлангани ҳақида ҳам тўхталиб ўтди.
«Бугунги кунда мамлакатда 800 та стартап-лойиҳа ишламоқда, уларнинг 60 таси аллақачон экспортга чиққан. Венчур фондларининг умумий капитали 350 млн долларга яқинлашди. Бутун стартап-экотизим қиймати 4 млрд долларга етди, ваҳоланки 10 йил олдин у 1 млн доллардан ошмас эди. Ишларимиз натижаси ўлароқ, Жаҳон банки баҳосига кўра, Ўзбекистон давлат бошқарувининг рақамли етилувчанлиги бўйича жаҳон рейтингида тўққизинчи ўринни эгаллади», — деб қайд этди Бош вазир.
Рақамли технологиялар вазири Шерзод Шерматов аввалроқ Европанинг SES провайдери билан Ўзбекистонда спутник интернет-шлюзини яратиш бўйича келишувга эришилганини маълум қилган эди. Унинг сўзларига кўра, Тошкент спутник интернети хабига айланади ва у ердан нафақат мамлакат ичида, балки минтақадаги қўшни давлатларга ҳам хизмат кўрсатилади.
Аввалроқ хабар берилганидек, SES Ўзбекистон, Қирғизистон ва Тожикистоннинг чекка ҳудудларини интернетга улаш учун спутник технологиялари ва ер усти терминалларини жойлаштиради. Бу Европа Иттифоқи томонидан молиялаштириладиган рақамли боғлиқлик соҳасидаги минтақавий лойиҳалардан биридир.
2025 йил октябрь ойида президент Шавкат Мирзиёев 2026 йилдан бошлаб мамлакатда мамлакатнинг чекка ҳудудларини юқори тезликдаги интернет билан таъминлайдиган спутник интернет-операторлари иш бошлашини маълум қилган эди. Улар 5 йил муддатга ер, мол-мулк, фойда солиғи ва ҚҚСдан озод қилинади.
Ўзбекистон, шунингдек, спутник интернети соҳасида Amazon компанияси билан ҳамкорликни кўриб чиққан эди.