Ўзбекистон ҳуқуқ-тартибот органлари Қўшилган қиймат солиғини (ҚҚС) қайтариш билан боғлиқ фирибгарлик схемасини фош этди, дея хабар беради Давлат хавфсизлик хизмати матбуот хизмати.
Идора маълумотларига кўра, илгари солиқ органларида ишлаган, ҳозирда эса Тошкентдаги транспорт-логистика компанияларидан бирида бухгалтер бўлиб ишлайдиган шахс бўёқ маҳсулотлари ишлаб чиқарувчи компания вакилидан 35 минг доллар талаб қилган. Ушбу суммага эвазига у ўзининг собиқ алоқалари орқали ҚҚС бўйича 17 миллиард сўм салбий фарқни қайтаришда ва тўхтатилган солиқ гувоҳномасининг амал қилишини тиклашда ёрдам беришни ваъда қилган.
ДХХ ва Бош прокуратура ҳузуридаги Иқтисодий жиноятларга қарши курашиш департаменти ходимлари томонидан ўтказилган тезкор тадбир давомида, ушбу шахс компания муассисидан 20,5 минг доллар олаётган вақтида ашёвий далиллар билан қўлга олинди.
Бухгалтер ва бошқа шахсларга нисбатан Жиноят кодексининг 28-моддаси орқали 168-моддаси 4-қисми «а» банди (жуда кўп миқдорда фирибгарлик) ва 211-моддаси 3-қисми «а» банди (жуда кўп миқдорда пора бериш) билан жиноят иши қўзғатилди.
Дастлабки тергов давомида, қўлга олинган шахс бу ишни Солиқ қўмитасининг катта инспектори орқали «ҳал қилиш» ниятида бўлгани аниқланган, у ҳам ишга гумонланувчи сифатида жалб қилинган.
2024 йилда Ўзбекистонда 7354 киши коррупция жиноятлари учун жазоланди — бу 2023 йилга нисбатан 12,5% кўп. Коррупциядан кўрилган зарар икки баравар ўсди — 2,8 триллион сўм. Ҳукм қилинганлар сони ва зарар бўйича Андижон вилояти етакчи бўлди. Энг кўп ҳукм қилинганлар — таълим ва тиббиёт соҳаларида.
