Ўзбекистон Энергетика вазири Жўрабек Мирзамаҳмудов «Ўзбекистон 24» телеканалига берган интервьюсида ёқилғи-энергетика соҳасидаги қатор етакчи Америка компаниялари билан ҳамкорликни кенгайтириш режалари ҳақида сўзлаб берди.
Унинг сўзларига кўра, АҚШдаги тадбирларда йирик инвесторлар қаторида автоматлаштириш ва энергетикага ихтисослашган технологик ҳамкорлар ҳам иштирок этган.
Вазир автоматлаштириш соҳасидаги жаҳон етакчиларидан бири бўлган Honeywell компанияси билан саноат ва энергетикада бир нечта лойиҳаларни амалга ошириш режалаштирилганини таъкидлади.
Унинг сўзларига кўра, Ўзбекистон президентининг технологик жараёнларга сунъий интеллектни фаол жорий этиш бўйича топшириқларини бажариш доирасида қўшма семинар ўтказиш режалаштирилган.
Вазирнинг маълум қилишича, нефть-сервис технологиялари соҳасидаги жаҳон етакчиси — Schlumberger компанияси устувор ҳамкорлар қаторидадир.
«Шунингдек, етакчи Schlumberger компанияси билан ҳамкорликни фаол ривожлантириш режалаштирилган бўлиб, у биз билан бурғулаш, замонавий бурғулаш усуллари ва технологияларини жорий этиш соҳасида, биринчи навбатда, Устюрт минтақасида ишлайди», — деди.
Шунингдек, Ўзбекистон Caterpillar компанияси, аниқроғи, газ ҳайдаш агрегатлари, двигателлар ва когенерация қурилмаларини ишлаб чиқарувчи Solar Turbines бўлинмаси билан музокаралар олиб бормоқда.
Бундан ташқари, АҚШда электр двигателларини ишлаб чиқарувчи Siemens Energy компанияси билан газ транспорт тизимини электрлаштириш масаласи муҳокама қилинмоқда.
«Америкада электр двигателлари ишлаб чиқарувчи Siemens Energy билан газ транспорт тизимини электрлаштириш ва табиий газдан фойдаланувчи двигателларни электр двигателларига алмаштириш имкониятини кўриб чиқмоқдамиз», — дея сўзини якунлади Жўрабек Мирзамаҳмудов.
Эслатиб ўтамиз, президент Шавкат Мирзиёев 2025 йил 6 ноябрь куни Америка бизнеси билан учрашувда АҚШ билан ҳамкорликнинг 4 та устувор йўналишини – энергетика, стратегик хомашё, логистика ва IT’ни белгилаб берган эди. Унинг сўзларига кўра, мамлакатда Қуёш ва Шамол электр станцияларини ривожлантириш энергия нархини 15% га пасайтиришга ва уни минтақадаги энг арзонларидан бирига айлантиришга имкон беради.
Ўзбекистон АҚШдан кичик атом реакторларини сотиб олишни ҳам режалаштирмоқда, Американинг Air Products компанияси эса Ўзбекистонда метанол ишлаб чиқариш заводини қуришга 3 млрд долларгача сармоя киритиш ниятида.
