Швейцариянинг Кран-Монтана тоғли курортидаги барлардан бирида янги йил кечаси содир бўлган ёнғин оқибатида 40 га яқин киши ҳалок бўлди, яна 115 киши жиддий жароҳат олди, деб хабар бермоқда BBC News ва Reuters.
Ҳалок бўлганларнинг шахсини аниқлаш маълум вақт талаб этади, деб огоҳлантирди расмийлар. Қурбонлар орасида Франция ва Италия фуқаролари борлиги маълум.
Ёнғин маҳаллий вақт билан соат 01:30 да Le Constellation деб номланувчи барда бошланган.
Ёнғин сабаби ҳозирча расман аниқланмаган, бироқ ҳуқуқ-тартибот идоралари ҳужум версиясини истисно қилишди.
Гувоҳларнинг журналистларга айтишича, ёнғин шампан виноси шишаларига ўрнатилган фейерверкларнинг ёғоч шифтга жуда яқин олиб келиниши натижасида келиб чиққан. Уларнинг сўзларига кўра, олов жуда тез суръатда бутун шифт бўйлаб тарқалган.
Le Constellation бардаги ёнғин «мамлакат бошидан кечирган энг даҳшатли фожиалардан бири» бўлди, деди Швейцария президенти Ги Пармелен. У ҳалок бўлганлар орасида ёшлар кўп бўлганини қайд этди.
Le Constellation бари Кран-Монтанадаги йирик муассаса ҳисобланади, деб ёзади Swissinfo. У 300 кишини сиғдира олар эди. Янги йил кечасида ташриф буюрувчиларнинг аниқ сони ҳозирча белгиланмаган.
Кран-Монтанадаги ҳодисадан сўнг Швейцария Давлат кенгаши фавқулодда ҳолат эълон қилди.