2025 йил сентябрь ойи якунларига кўра, Ўзбекистонда инфляция 0,6% ни ташкил этди. Бу Статистика бўйича Миллий қўмита маълумотларидан келиб чиқади.
Бу 2024 йилнинг сентябрь ойи кўрсаткичидан (1,2%) бироз паст. Йиллик ифодада инфляция ҳам 8,8% дан 8% га секинлашди.
Йиллик инфляциянинг сезиларли даражада секинлашиши 2024 йили катта улушга эга бўлган айрим товарлар бўйича юқори база эффектининг чиқиб кетиши билан изоҳланиши мумкин. Хусусан, 2024 йил сентябрда картошка нархи 11% га ўсган бўлса, бу йил 0,4% га арзонлашди. Бир йил олдин сентябрда пиёз 10% га қимматлаган бўлса, бу йил 3,6% га арзонлашди. Худди шундай, пропан 15,7% га қимматлаган бўлса, бу йил сентябрда нархи 1% га пасайди.
Озиқ-овқат маҳсулотлари бир ой ичида ўртача 0,9% га қимматлашди (ўтган йилнинг сентябрида — 1,4%), ноозиқ-овқат маҳсулотлари ва хизматлар — 0,3% га (мос равишда 0,8% ва 1,5%).
Бир ой ичида энг кўп сабзавот ва мевалар нархи ошди: помидор — 16,9% га (бир йилда 31,5% га пасайган), булғор қалампири — 10,4% га (-11,8%), сабзи — 7,7% га (+57,5%), қовун — 5,5% га (+3,4%), банан — 1,8% га (-7,3%).
Шу билан бирга, пиёз нархи — 3,6% га (+22,4%), карам — 2,2% га (+27,4%), бодринг — 2,2% га (-30,7%), лимон — 1,9% га (+52,5%), олма — 1,2% га (-7,1%), картошка — 0,4% га (+18,5%) пасайди. Гуруч ҳам 0,4% га арзонлашди (-18,3%).
Тухум сезиларли даражада қимматлашди — 6,5% га (бир йилда 3,4% га пасайган), ўсимлик ёғлари — 0,6% га (+29,1%), суяксиз мол гўшти — 1,8% га (+25,2%), суякли мол гўшти — 1,7% га (+23,2%), қўй гўшти — 1,5% га (+26,8%), парранда гўшти — 1,2% га (+7,3%), сут — 0,6% га (+7%), пишлоқ — 1,2% га (+7%), шакар — 0,7% га (-3,2%).
Дори-дармонлар 0,2% га қимматлашди (+6,7%).
Коммунал хизматлар тарифлари бир нечта ҳудудларда ошди: Навоий вилоятида — совуқ сув таъминоти ва канализацияга, Қашқадарё вилоятида — маиший чиқиндиларни олиб чиқишга, Тошкент вилоятида — иситиш ва иссиқ сувга.
Бензин бир ойда ўртача 1,4% га қимматлашди (бир йилда — 11,8%). Сентябрь ойида Аи-80 маркали бензин нархи диапазони бир литр учун 8 200—9 500 сўмни, Аи-91 ва Аи-92 — бир литр учун 10 500 дан 13 300 сўмгача, Аи-95 учун — бир литр учун 12 500 дан 15 300 сўмгача, кузатилган энг қиммат бензин тури бўлган АИ-100 маркали бензин эса бир литри 18 000 сўм нархда сотилди.
Пропан нархи 1% га пасайди (-19,7%), метан нархи эса деярли ўзгармади (аммо бир йилда +30,6%). Ҳайдовчилик курсларидаги ўқиш нархи яна 5% га ошди (73,3%).
Йўловчи ташиш хизматлари нархи бир ойда 0,6% га ўсди (+16,2%). Шу билан бирга, кузатилган йўналишлар бўйича узоқ масофали поездларда юриш нархи 1,1% га пасайди (+7,4%), республика ичидаги авиақатновлар 0,9% га (-57,3%), халқаро авиақатновлар — 0,8% га (-5,4%) арзонлашди, автойўл транспорти хизматлари эса, аксинча, 1% га қимматлашди (+15,7%).
Ҳудудлар орасида бир ой ичида энг юқори инфляция Навоий вилоятида (0,7%), йиллик ифодада эса Фарғонада (8,9%) қайд этилди.
