Тошкентдаги Aviator СКМда содир бўлган ҳамда ёнғин хавфсизлиги ва фуқароларни эвакуация қилиш тизимидаги жиддий камчиликларни юзага чиқарган йирик ёнғиндан сўнг, Ўзбекистон ФВВ савдо мажмуалари, кўнгилочар марказлар, умумий овқатланиш ва маиший хизмат кўрсатиш объектлари раҳбарларига мурожаат қилди. Ёнғин натижасида 3 ёшга ҳам тўлмаган қизалоқ ҳалок бўлди, кўплаб болалар ва катталарга шифокорлар ёрдами талаб этилди.
ФВВ бошқарма бошлиғи Одил Кулдашев томонидан ўқиб эшиттирилган мурожаатда айтилишича, ёнғин хавфсизлиги талабларига риоя қилиш учун жавобгарлик тўлиқ объект раҳбарлари зиммасида бўлиб, қўпол қоидабузарликлар фаолиятни тўхтатиб қўйишга олиб келиши мумкин. У фожиалар такрорланишининг олдини олиш учун зарур бўлган бир қатор амалдаги талабларни санаб ўтди.
Одил Кулдашев эвакуация чиқиш йўллари доимий равишда очиқ ва соз ҳолатда бўлиши, бинолар эса етарли миқдорда соз ҳолатдаги ёнғинга қарши воситалар билан таъминланиши ҳамда улар мунтазам текшириб турилиши лозимлигини таъкидлади. Ишчи ва хизматчилар фавқулодда вазиятларда, хусусан, ёнғин чиққанда тўғри ҳаракат қилиш бўйича билим ва кўникмаларга эга бўлишлари шарт, деб қайд этди ФВВ вакили. Объект ҳудуди ижарага берилганда эса шартнома шартларида ижарачи томонидан ёнғин хавфсизлиги талабларига мажбурий риоя этилиши кўзда тутилган бўлиши керак.
Текширувлар бошланди
Одил Кулдашевнинг сўзларига кўра, Ўзбекистон бўйлаб ишчи гуруҳлар тузилган бўлиб, улар Aviator СКМга ўхшаш объектларда ёнғин хавфсизлиги талабларига риоя этилишини текширмоқда. «Ёнғин хавфсизлиги талабларининг қўпол равишда бузилиши аниқланганда, аниқланган камчиликлар тўлиқ бартараф этилгунга қадар объектлар фаолияти вақтинчалик тўхтатилади», — деб таъкидлади.
ФВВ вакили объект раҳбарлари ва бошқа шахсларнинг ёнғин хавфсизлиги талабларини бузганлик учун маъмурий ва жиноий жавобгарликка тортилиши ҳақида эслатиб ўтди. «Қонун талабларини билмаслик жавобгарликдан озод этмайди», — деди Одил Кулдашев сўзи якунида. Қоидаларга қатъий риоя қилиш «фуқаролар, шунингдек, объект ишчи ва хизматчиларининг ҳаёти ва соғлиғини фавқулодда вазиятлардан ҳимоя қилиш имконини беради», деб қайд этди.
Эслатиб ўтамиз, Aviator СКМдаги ёнғин ҳолати бўйича Жиноят кодексининг 192−11 (нодавлат ташкилот мансабдор шахсларининг ўз ваколатларини суиистеъмол қилиши) ва 259 (ёнғин хавфсизлиги қоидаларини бузиш) моддалари билан жиноят иши қўзғатилган эди.