Самарқандда 2025 йил апрель ойида пиёдалар ўтиш жойида катта тезликда эркак ва болани (ота-бола) уриб юборган 19 ёшли ҳайдовчи 6 йилга озодликдан маҳрум этилди. Ҳукмни 2025 йил 22 июль куни Самарқанд шаҳар жиноят ишлари бўйича суди чиқарди.
Иш ҳужжатларига кўра, судланувчи Х.Ҳайдаров 2025 йил 3 апрель куни тахминан соат 20:15 да Cherry Tigo 7 Pro русумли автомобилни бошқариб, Али Қушчи кўчасидаги «Бонасенс» дўкони олдидаги пиёдалар ўтиш жойида икки пиёдани уриб юборган. Туғилган куни нишонланаётган бола вафот этган, отаси ҳаёт учун хавфли жароҳатлар олган. Ҳайдовчи уриб юборганидан сўнг иккисини ҳам шифохонага олиб борган. У 4 апрелдан буён ҳибсда эди.
Йигит судда ўз айбига тўлиқ иқрор бўлди. У машинани 2025 йил март ойида ота-онаси сотиб олгани, ўзи эса 2024 йилдан бери машина ҳайдаётганини айтди.
Ҳайдовчи 60-65 км/соат тезликда кетаётганини ва пиёдаларни 30 метр масофада кўриб, ўз вақтида тўхтай олмаганини таъкидлади.
У марҳумнинг оиласидан кечирим сўраганини ва зарарни қоплашга тайёрлигини билдирганини, бироқ оила уни кечирмаганини айтди. Судланувчи айбига иқрор экани ва пушаймонлигини такрорлаб, суддан жазони енгиллаштиришни сўради.
Боланинг онасининг сўзларига кўра, авария содир бўлган куни турмуш ўртоғи ўғлининг туғилган куни шарафига унга кийим сотиб олиш учун уйдан чиқиб кетган. Улар хариддан кейин уйларига қайтаётган эди. Аёл судланувчини кечирмаслигини такрорлади ва суддан унга энг юқори жазо беришни сўради.
Боланинг отасининг айтишича, у ўғлини қўлидан ушлаб йўлни кесиб ўтган. Унинг сўзларига кўра, автомобиль 120-130 км/соат тезликда ҳаракатланган. Эркак ўз даволаниши учун 30 млн сўмдан ортиқ пул сарфлаганини маълум қилди. У ҳам айбдорга нисбатан қаттиқроқ жазо тайинлашни сўради.
Судланувчининг ҳаракатлари Жиноят кодексининг 266-моддаси 2-қисми — транспорт воситалари ҳаракати ёки улардан фойдаланиш хавфсизлиги қоидаларини бузиш, одам ўлимига сабаб бўлиш (муайян ҳуқуқдан маҳрум қилиб, етти йилгача озодликдан маҳрум қилиш билан жазоланади) билан квалификация қилинди.
Суд айбга тўлиқ иқрорлик ва пушаймонликни енгиллаштирувчи ҳолатлар сифатида қабул қилиб, ҳайдовчини 6 йилга озодликдан маҳрум этишга ҳукм қилди (ҳибсга олинган кундан бошлаб — 4 апрель). Йигит жазони манзил-колонияда ўтайди. Шунингдек, у 2 йил муддатга транспорт воситаларини бошқариш ҳуқуқидан маҳрум этилди.
Суд судланувчидан жабрланган отасига 30,1 млн сўм моддий зарарни қоплашга ҳукм қилди.
