Самарқанд вилоятида гиёҳвандлик воситаларининг ноқонуний айланиши билан боғлиқ иккита ҳолатга чек қўйилди ва 38 кг га яқин тақиқланган моддалар олиб қўйилди, деб хабар берди Давлат хавфсизлик хизмати.
Биринчи ҳолатда чегарачилар ва хизматнинг вилоят бошқармаси Ургут туманида яшовчи 1989 ва 1992 йилларда туғилган уч нафар шахсни қўлга олди. Ушбу фуқаролар аввалдан кузатувда бўлган ва ўрганишлар шуни кўрсатдики, улар айланма йўллар орқали Тожикистоннинг Панжакент туманига ўтиб, у ердаги гиёҳвандфурушлардан 14,8 кг опий ва қарийб 15 кг гашиш сотиб олганлар.
Ўзбек-тожик чегарасини ноқонуний кесиб ўтиб, Ўзбекистонга қайтаётган вақтда гумонланувчилар ашёвий далиллар билан қўлга олинди.
Иккинчи ҳолатда ДХХ ва ички ишлар органлари ходимлари Самарқанд шаҳрида тезкор-қидирув тадбирларини ўтказдилар. «Орзу» маҳалласидаги шахсий гаражлардан бирида холислар иштирокида кўздан кечириш ўтказилганда, яширин жой аниқланди.
Махсус жиҳозланган яширин жойдаги мармар тошлар орасида 9 кг дан сал кўпроқ опий экстракти борлиги маълум бўлди. ДХХ маълумотларига кўра, бундай моддалар одатда мамлакатга контрабанда йўли билан олиб кирилади.
Ҳар иккала ҳолат бўйича Жиноят кодексининг 246-моддаси 2-қисми ва 273-моддаси 5-қисми билан жиноят ишлари қўзғатилган. Қўлга олинганларга нисбатан қамоққа олиш эҳтиёт чораси қўлланилган, шунингдек, гараж эгасини қўлга олиш чоралари кўрилмоқда.
Қонунчиликка кўра, бу каби жиноятлар учун 20 йилгача озодликдан маҳрум қилиш жазоси назарда тутилган.