2025 йил 12 декабрь куни Россиянинг Хабаровск шаҳрида ОМОН ходимлари Ўзбекистон фуқароларини калтаклагани, натижада улардан икки нафари комага тушгани, бир нафари эса ҳалок бўлгани ҳақида хабарлар тарқалди. Ўзбекистон Ташқи ишлар вазирлиги 2026 йил 2 январь куни мамлакат фуқароси вафот этганини тасдиқлади.
«Ҳозирги вақтда фуқаронинг ўлими сабаблари тўғрисида расман тасдиқланган маълумот йўқ. Тегишли органлардан аниқ маълумотлар олиниши билан жамоатчиликка қўшимча ахборот тақдим этилади», — дея маълум қилди ТИВ.
Ўзбекистоннинг Владивостокдаги Бош консуллиги Хабаровск вилояти прокуратураси, Тергов бўлими ва Россия ТИВнинг Хабаровскдаги ваколатхонасига иш юзасидан ҳар томонлама ва холисона тергов ўтказишни сўраб ноталар юборди.
Ўзбекистон ТИВнинг қўшимча қилишича, Бош консуллик марҳумнинг яқинларига ёрдам кўрсатмоқда ва жасадни ватанга репатриация қилиш устида ишламоқда.
2026 йил 2 январь куни Олий Мажлис Қонунчилик палатаси депутати, «Миллий тикланиш» демократик партияси раҳбари Алишер Қодиров вазиятга муносабат билдирди. «Ишонинг, вазият ой сайин фақат ёмонлашиб бораверади», — деди.
«Россия махсус хизматлари Марказий Осиё аҳолисини Россияда кутилаётган тартибсизликларнинг фаол иштирокчилари деб ҳисобламоқда, тегишлича, улар келтираётган фойдага энди умид қилишмаяпти», — деб таъкидлади депутат.
«Ақл билан ўйланг, Россиядан имкон қадар тезроқ кетинг! Ҳеч қандай даромад ота-онангиз ва фарзандларингиз кўз ёшига арзимайди», — дея чақирди.
Эртаси куни ЎзЛиДеП партияси депутати, «Юксалиш» ҳаракати раҳбари Бобур Бекмуродов ўзининг Telegram-каналида пост эълон қилиб, меҳнат мигрантлари Ўзбекистон иқтисодиётига катта ҳисса қўшаётганини ёзди.
Ўз нутқидан илова қилинган видеолавҳада у Россияда ўзбекистонликларни ҳақорат қилиш ҳолатларини қабул қилиб бўлмас деб атади. Бироқ бу россияликларга нисбатан ёмон муносабатда бўлиш учун сабаб бўлмаслиги кераклигини кўрсатди. «Ҳар бир жамиятда яхши ва ёмон одамлар бор», — деди Бобур Бекмуродов.
У барча мигрантларни Ўзбекистонда иш билан таъминлаш имконияти йўқлигини тан олди. Шу билан бирга, мамлакатдаги иқтисодий ўсиш туфайли хориждаги мигрантлар сонининг камайиш тенденцияси кузатилаётганини қайд этди. Россияда уларнинг сони тўққиз йил ичида уч бараварга камайган.
Журналист Илёс Сафаровнинг ёзишича, Алишер Қодировнинг чақириғи мантиқий бўлса-да, масаланинг иккинчи томонини ҳам унутмаслик керак.
«Биринчи қарашда бу чақириқ мантиқий ва адолатли туюлади. Зеро, Россия бугун миллатчилик ва ксенофобия муҳитига тобора чуқурроқ ботмоқда ва Марказий Осиё халқлари учун айниқса хавфли маконга айланмоқда. Бироқ қишлоқда яшаган ва камида бир яқини ҳозирда Россияда ишлаётган одамлар билан доимий мулоқот қиладиган шахс сифатида айта оламанки: меҳнат мигрантларини фақатгина депутатнинг иссиқ кабинетидан ёзилган постлари билан Ватанга қайтариб бўлмайди», — деб таъкидлади журналист.
«Ўз юртида барқарор иш топа олмаётган ва зиммасида оила боқиш масъулияти бўлган эркак киши учун Россиядаги таҳқирли ва хавфли муҳит барибир нисбатан “яхшироқ” танлов бўлиб қолмоқда. Аччиқ ҳақиқат шундаки, одамлар Россияга яхши ҳаёт учун эмас, балки муҳтожликдан кетишмоқда», — дея эслатди Илёс Сафаров.
Журналистнинг сўзларига кўра, мигрантлар оиласи учун ҳар қандай оғир, камситувчи ва хавфли шароитларда ишлашга рози бўладилар.
«Шунинг учун уларнинг қайтиши учун қуруқ чақириқлар эмас, балки реал ечимлар: кафолатланган иш ўринлари ва муносиб даромад манбалари керак. Акс ҳолда, бу каби фожиалар тўхтамайди, бугунги баёнотлар эса эртага яна унутилади», — дея хулоса қилди.
