Россиянинг Ўзбекистондаги элчиси Олег Мальгинов ўз дипломатик миссиясини якунламоқда. Бу ҳақда у 2025 йил 10 июнь куни Тошкентда Россия куни муносабати билан ўтказилган қабулдаги нутқида маълум қилди.
“Ўзбекистон Республикаси Президенти Шавкат Миромонович Мирзиёевга, республика ҳукуматига ва бутун ўзбек халқига бизга кўрсатган кўмаги учун жуда миннатдорман. Дўстона ўзбек заминида, бир миллионга яқин ватандошларимиз тинчлик ва тотувликда яшаётган жойда Россия кунини бешинчи марта нишонлаш мен учун катта шараф”, — деди Олег Мальгинов.
У Ўзбекистон Россиянинг Марказий Осиёдаги асосий ҳамкорларидан бири эканлигини таъкидлади: “Ғарбнинг мамлакатларимиз ўртасида низо уруғини сочишга бўлган кўплаб уринишларига қарамай, биз тенглик, ўзаро манфаат, ҳурмат ва бир-биримизнинг манфаатларимизни ҳисобга олиш асосида мулоқотни давом эттирмоқдамиз”.
Дипломатнинг қайд этишича, фақат 2025 йил бошидан буён Ўзбекистон 20 дан ортиқ юқори мартабали Россия делегацияларини, шунингдек, Россия ҳудудларидан 30 дан ортиқ делегацияларни қабул қилган.
Элчи мамлакатлар БМТ, ЕХҲТ, ШҲТ ва бошқа ташкилотлар каби халқаро майдонларда ўхшаш позицияларни эгаллаётганини билдирди. Унинг сўзларига кўра, Москва Тошкентнинг МДҲ ҳудудидаги интеграция жараёнларида, шунингдек, ЕОИИда кузатувчи сифатида фаол иштирокини олқишлайди.
“Икки томонлама муносабатларнинг бутун тизимини ривожлантиришда мамлакатларимиз раҳбарлари ўртасидаги шахсий алоқалар ва ишончли мулоқот катта роль ўйнайди. Уларнинг мунтазам алоқалари сиёсат ва иқтисодиётдан тортиб, илм-фан, таълим, туризм ва маданиятгача бўлган ўзаро ҳамкорликнинг тобора кенгайиб бораётган спектрини янги амалий мазмун билан бойитишга имкон беради”, — деди Мальгинов.
Эслатиб ўтамиз, Олег Мальгинов 2021 йил март ойидан буён Ўзбекистонда элчи сифатида фаолият юритиб келмоқда.
