Ўзбекистонда вояга етмаганларнинг жинсий дахлсизлигига қарши такрорий жиноятлар учун умрбод озодликдан маҳрум қилиш жазосини жорий этиш режалаштирилмоқда. Бу ҳақда Президент администрациясининг суд тизимини ислоҳ қилиш масалалари бўйича раҳбар ўринбосари Нодира Ҳакимова «O‘zbekiston 24» телеканалига берган интервьюсида маълум қилди.
Унинг сўзларига кўра, тегишли чоралар президентнинг хотин-қизлар ва болалар ҳуқуқларини ҳимоя қилишни кучайтиришга қаратилган фармонида кўзда тутилган.
«Халқимиз бу масала бўйича фаол ташаббуслар билан чиқаётганини кўриб турибмиз ва президент ушбу таклифларнинг қонунчиликда акс этишини мустаҳкамлаб қўйди», — деди Нодира Ҳакимова.
У бундай жиноятлар учун ҳукм қилинган шахсларни манзил-колонияларга ўтказишга йўл қўймаслик масаласи алоҳида муҳокама қилинганини таъкидлади.
«Ўтган йили барчамиз бутун жамиятни ларзага солган мудҳиш жиноятларнинг гувоҳи бўлдик. Гап шундаки, рецидивист-педофиллар манзил-колонияларга ўтказилганидан кейин яна вояга етмаган қизларга нисбатан жиноятлар содир этишган», — дея баёнот берди.
Бу ерда гап 2025 йил октябрь ойида корхонадан қочиб кетиб, 9 ёшли қизни зўрлаган манзил-колониянинг 31 ёшли маҳкуми билан боғлиқ ҳодиса ҳақида бормоқда. У 18 йилга озодликдан маҳрум этилган ва ўта хавфли рецидивист деб топилган эди. Ушбу шахс 2018 йилдан бери худди шундай бола зўрлаш жинояти учун жазо ўтаётган бўлган.
Ҳакимованинг сўзларига кўра, бундай жиноятлар энг оғир тоифага киради.
«Нима учун биз уларни манзил-колонияларга ўтказмаслигимиз керак? Нима учун энди рецидивист-педофилларга нисбатан умрбод озодликдан маҳрум қилиш жазосини қўллаш таклиф этилмоқда? Чунки бундай жиноятларни қасддан одам ўлдириш каби энг оғир жиноятларга тенглаштириш мумкин. Бу кичкина қизчанинг бутун ҳаётини барбод қилиши мумкин бўлган жиноятлардир. Айнан шунинг учун президент ўз фармонида шундай қатъий ислоҳотларни белгилаб берди», — дея таъкидлади.
Эслатиб ўтамиз, президент фармони билан 3 ой муддатда вояга етмаганларнинг жинсий эркинлигига қарши жиноятлар, улар билан жинсий алоқа қилиш ва уятсиз-бузуқ ҳаракатлар содир этганлик учун илгари судланган шахслар томонидан қуйидаги жиноятлар қайта содир этилган тақдирда жазо белгилаш тўғрисидаги қонун лойиҳасини тайёрлаш топширилган:
- 14 ёшга тўлмаган шахснинг номусига текканлик учун — умрбод озодликдан маҳрум қилиш;
- 14 ёшга тўлмаган шахсга нисбатан жинсий эҳтиёжни зўрлик ишлатиб ғайритабиий шаклда қондирганлик учун — узоқ муддатли озодликдан маҳрум қилиш.
Бундан ташқари, 16 ёшга тўлмаган шахсга нисбатан бир гуруҳ шахслар томонидан уятсиз-бузуқ ҳаракатлар содир этганлик учун янада қаттиқроқ жавобгарлик белгилаш, шунингдек, тергов ва суд амалиётидан келиб чиқиб, ЖКнинг 129-моддаси (16 ёшга тўлмаган шахсга нисбатан уятсиз-бузуқ ҳаракатлар қилиш) диспозициясига аниқлик киритиш режалаштирилган.