Рақобатни ривожлантириш қўмитаси Ўзбекистондаги йирик савдо тармоқлари ва мажмуаларини Рамазон ойида нархлар барқарорлигини таъминлаш зарурлиги ҳақида огоҳлантирди, деб хабар берди идора матбуот хизмати.
Тадбиркорларга чакана нархларнинг ўзгаришига таъсир этувчи омиллар, жумладан, логистика ва бошқа харажатларнинг ошиши ҳақида қўмитани тезкорлик билан хабардор қилиш, шунингдек, етказиб берувчиларни нархларни асоссиз равишда оширишга йўл қўйилмаслиги ҳақида огоҳлантириш тавсия этилди.
«Рақобат қўмитаси ўз ваколатлари доирасида мамлакат аҳолиси учун муҳим аҳамиятга эга бўлган ижтимоий муҳим озиқ-овқат товарлари нархлари барқарорлигини таъминлашга қаратилган зарур чораларни кўрмоқда», — деб қайд этди идора.
Ўзбекистон президенти 2026 йил 13 февраль куни бўлиб ўтган йиғилишда Рамазон ойи бошланишига қадар ички бозорда нархлар барқарорлигини таъминлаш ҳамда деҳқон бозорлари ва йирик савдо мажмуаларида ҳамёнбоп озиқ-овқат товарлари билан таъминланган ярмаркалар ташкил этиш бўйича топшириқ берган эди.
Туркий давлатлар ташкилоти (ТДТ) Мусулмон диний идоралари раҳбарлари кенгаши ҳузуридаги Фатво қўмитаси маълумотларига кўра, 2026 йилда Рамазон ойининг бошланиши 2026 йил 19 февраль, пайшанба кунига тўғри келади. Рўза тугаши — Рамазон ҳайити — 20 март, жума куни нишонланади. Ўзбекистонда унинг байрам қилиниши Наврўз дам олиш кунлари билан бир вақтга тўғри келиши кутилмоқда.