Ўзбекистонда давлат органларида қоғозсиз ҳужжат айланишига ўтиш тезлаштирилади. Бу Вазирлар Маҳкамасининг 2026 йил 18 мартдаги қарорида кўзда тутилган, деб хабар берди Адлия вазирлигининг Telegram-канали.
Ҳужжат Республика ва маҳаллий ижро этувчи ҳокимият органларида иш жараёнларини рақамлаштириш доирасида қоғоздан фойдаланишни тартибга солишга қаратилган.
Қарорга мувофиқ, 2026 йил 1 июнга қадар ишлатилган қоғозларни йиғиш учун махсус контейнерлар ўрнатилади, шунингдек, уларни қайта ишлаш корхоналарига топшириш тизими йўлга қўйилади.
Бундан ташқари, ҳар бир таркибий бўлинмада ходимлар сони, иш ҳажми ва реал эҳтиёждан келиб чиқиб, қоғоз сарфига чекловлар жорий этилади.
2026 йил 1 майдан бошлаб давлат органларида қўшимча чора-тадбирлар кучга киради. Хусусан, яқин 5 йил учун харажатларни режалаштиришда қоғоз, бўёқ (сиёҳ), принтер ва нусха кўчириш техникаси учун сарф-харажатлар ҳар йили 15 фоизга қисқартирилади.
Шунингдек, принтерлардан марказлаштирилган ҳолда фойдаланиш тизими жорий этилади: очиқ офисларда (open space) ҳар 20 нафар ходимга битта принтер тўғри келади.
Бундан ташқари, давлат органларида ҳар ойда «Қоғозсиз кун» экологик акциясини ўтказиш режалаштирилмоқда.
2025 йил ноябрь ойида президент давлат бошқарувини рақамли трансформация қилиш ва унинг самарадорлигини оширишга қаратилган «Бюрократияни бартараф этиш – 2030» дастурини 2026 йил 1 январдан ишга тушириш тўғрисидаги фармойишни имзолаган эди.
Ўша ойда бюрократияни қисқартириш масалаларига бағишланган халқаро форумда давлат раҳбари Ўзбекистон қоғоз ҳужжат айланишидан тўлиқ воз кечган ҳолда «қоғозсиз ҳукумат» тизимига ўтишини маълум қилди. Мавжуд 40 миллион ҳужжатдан 25 миллионини рақамлаштириш, яна 5 миллионини эса жорий йил давомида электрон шаклга ўтказиш режалаштирилган.