Ўзбекистонда Қирғизистондан келган, орқа ойналари тонировка қилинган автомобиллардан 15 АҚШ доллари қийматида йиғим амалга оширилмоқда. Бу ҳақида Қирғизистон Жокоргу Кенешида (парламент) 2025 йил 2 апрель куни депутат Дастан Бекешев, Ташқи ишлар вазири Жээнбек Кулубаевга мурожаат қилиб маълум қилди.
Қирғизистонликлар, Жалолобод вилоятидан Боткенга ва орқага йўл олишганда, Ўзбекистон ҳудудидан ўтишга мажбур. Депутатнинг сўзларига кўра, Ўзбекистон орқа ойналари қорайтирилган автомобиллардан 15 АҚШ доллари йиғимини олади. «Ҳар бир машина. Ҳар куни деярли. Биз улардан [йиғим] олмаймиз», — деди у.
Шу билан бирга, тўловни амалга ошириш учун Қирғизистон банки MBANK мобил илова усулидан фойдаланилмоқда.
Дастан Бекешев ўзбек автомобиллари учун Қирғизистонга кириш учун шунга ўхшаш йиғим жорий қилиш ёки қўшни давлат билан келишиб, йиғимдан озод қилишни таклиф қилди.
Ташқи ишлар вазири Жээнбек Кулубаев бу савол илгари кўтарилмаганини айтиб, ҳолатни ишлаб чиқишга ваъда берди. «Биз бу масалада тенглик асосида фикрлашишимиз ва ҳукуматлараро комиссия йиғилишида кўтаришимиз мумкин», — деб жавоб берди у.
Эслатиб ўтамиз, Ўзбекистон Республикасининг 2018 йил 18 июлдаги «Туси ўзгартирилган (қорайтирилган) ойнали автотранспорт воситаларидан фойдаланишни тартибга солиш чора-тадбирлари тўғрисида»ги қарорига мувофиқ, Ўзбекистон ҳудудига ва ундан транзит ўтадиган хорижий давлатлардан келган, орқа ойналарининг туси ўзгартирилган енгил машиналардан 15 доллар йиғими олинади, бу йиғим давлат бюджетини тўлдиришга йўналтирилади.
Қирғизистонда физик жисмоний шахслар учун автомобилларни тонлаш учун рухсат олиш йиғими йилига 50 минг сом (7,44 млн сўм), юридик шахслар учун эса 70 минг сом (10,4 млн сўм) ни ташкил қилади.
Ўзбекистонда орқа ойнаси ва орқа эшиклар ойналарини тонировка қилиш учун рухсат олиш ва йиғим тўлаш керак эмас. Жисмоний шахслар учун олдинги эшиклар ойнаси тусини ўзгартириш йилига 8 БҲМ (3 млн сўм) тўлаш талаб қилинади.
