Ўзбекистон Соғлиқни сақлаш вазирлиги шифокор рецептисиз бериладиган ва «тиббиёт амалиётида энг кўп қўлланиладиган» дори воситалари рўйхатини эълон қилди. Ушбу рўйхатни вазирликнинг Telegram-каналидан ёки ушбу сайт орқали юклаб олиш мумкин.
Рўйхатга шамоллаш белгиларини йўқотувчи, аллергияга қарши дорилар, витаминлар, жароҳатларни даволаш воситалари, масалан, йод ва водород пероксиди ва бошқалар киритилган. Рўйхатда жами 1846 та рўйхатдан ўтган рецептсиз бериладиган дори воситаларининг 400 га яқини мавжуд.
Фармацевтика тармоғини ривожлантириш агентлигининг веб-сайтида дори воситаларини бериш шартларини (рецепт бўйича ёки рецептсиз) текшириш мумкин.
«Соғлиқни сақлаш вазирлиги фуқароларнинг хавотирини тўлиқ тушунади ва таъкидлайди: шошилинч вазиятларда, шунингдек, болаларга, кекса ёшдаги шахсларга ва сурункали касалликларга чалинган беморларга тиббий ёрдам кўрсатишда ҳеч ким зарур дори-дармонларсиз қолмайди. Бу тоифадаги беморлар алоҳида назоратда бўлади», — дея ваъда берди Соғлиқни сақлаш вазирлиги.
Telegram’да ҳам @ssv_pilotbot боти ишга туширилган бўлиб, унда дорихоналардан дориларни бериш тартиби билан боғлиқ мурожаатлар устувор тартибда қабул қилинади.
Фақат рецепт бўйича бериладиган дори воситаларининг реестри 12,8 мингдан ортиқ номдаги (миқдори эмас) ва дозадаги дори воситаларини ўз ичига олади. Улар орасида тиббий этил спирти, ацикловир (таблеткалар ва кукун), парацетамол (фақат сироп ва инфузия учун эритма шаклида), ибупрофен (суспензиялар ва таблеткалар), амброксол (сироп ва эритмалар), супрастин (инъекция учун эритма), арбидол (суспензия учун кукун), ибуклин (таблеткалар), нимесил, аскорбин кислотаси (эритма), диклофенак (томчи, суппозиторийлар ва эритмалар) ва бир қатор бошқа воситалар мавжуд.