Оҳангарон туманига ташрифи давомида президент Шавкат Мирзиёев шу номдаги бренд остида маиший техника ишлаб чиқарувчи Premier корхонаси билан танишди, дея хабар берди давлат раҳбари матбуот хизмати.
Лойиҳа Бирлашган Араб Амирликларининг Fajr Al Mustaqbal General Trading компанияси билан ҳамкорликда 10 гектар майдонда амалга оширилмоқда, унинг умумий қиймати 30 миллион долларни ташкил этади.
Экспорт ҳажми 4 миллион долларни ташкил этиши кутилмоқда. Ҳозирги вақтда қурилиш ишлари 95 фоизга бажарилган бўлиб, 11,3 миллион долларлик инвестиция ўзлаштирилган.
Ишлаб чиқарилаётган маҳсулотлар Озарбайжон, Қозоғистон, Тожикистон, Россия, Қирғизистон ва Афғонистонга экспорт қилинади.
Ҳозирда бу каби корхоналар Ўзбекистонда атиги иккита, Марказий Осиёда эса тўрттани ташкил этади. Ишлаб чиқариш ҳажми бўйича корхона улар орасида иккинчи ўринни эгаллайди.
Келгусида корхона тўлиқ қувватга чиққач, 87 миллион долларлик импорт ўрнини босувчи маҳсулотлар ишлаб чиқарилиши кутилмоқда.
Давлат раҳбари корхонадаги ишлаб чиқариш жараёни ва маҳсулотлар сифатини кўздан кечирди, мутахассислар ва ишчилар билан суҳбатлашди.