Ўзбекистонда полиэтилен гранулалари импорти учун акциз солиғи ва этилен ва пропилен полимерларининг бирламчи шакллари учун божхона тўловлари бекор қилинмоқда. Бу президентнинг 2025 йил 18 августдаги қарорида юқори қўшимча қийматга эга бўлган этилен ва пропилен полимерларидан маҳсулот ишлаб чиқарувчи маҳаллий корхоналарни қўллаб-қувватлаш мақсадида назарда тутилган.
Ҳужжатга мувофиқ, 2025 йил 1 сентябрдан 2028 йил 1 январгача мамлакатда ишлаб чиқарилмайдиган ва тасдиқланган рўйхатга асосан олиб кириладиган полиэтилен гранулалари учун акциз солиғининг ноль ставкаси (ҳозир 10%) қўлланилади.
2028 йилгача этилен ва пропилен полимерларининг айрим бирламчи шакллари (ТИФ ТН кодлари 3901 10 900 0, 3901 30, 3901 40, 3902 10 000 0) импортига божхона тўловлари ҳам бекор қилинади, улар бугунги кунда 5%ни ташкил этади.
Шу билан бирга, Божхона қўмитаси ва Ўзбекистон техник жиҳатдан тартибга солиш агентлиги экс-официо принципи асосида мамлакатга сифатсиз ва қалбаки эгилувчан қадоқлаш — полиэтилен ва полипропилен плёнкалар, тўқимаган материаллар, қоплар, биг-бэгларга ўхшаш қадоқлаш ва бошқа маҳсулотлар олиб кирилишига қарши чоралар кўриши керак.
Бундан ташқари, 2025 йил 1 октябргача маҳаллий ишлаб чиқарувчи корхоналар учун акциз солиғини ҳисоблашда импортга тенг шарт-шароит яратиш бўйича таклифлар тайёрлаш вазифаси юклатилган.
