Тошкентда 24 ёшли йигит пиротехника буюмининг тўсатдан ишлаб кетиши натижасида қўл кафтидан айрилди ва юзидан куйиш жароҳатини олди. Бу ҳақда пойтахт ИИББ матбуот хизмати хабар берди.
Ҳодиса Янгиҳаёт туманидаги хонадонлардан бирида юз берган. Жабрланувчининг онаси хонада портлаш овозини эшитганини, шундан сўнг ўғли юзи куйган ва қўли қонлаган ҳолда чиқиб келганини айтиб берган. Йигит пиротехникани қўлида ушлаб турганини маълум қилган.
Республика шошилинч тиббий ёрдам илмий маркази травматологи Анвар Исмоиловнинг сўзларига кўра, бемор кучли шок ҳолатида олиб келинган. Текширувлардан сўнг у зудлик билан операцияга йўналтирилган.
Йигитда чап билак соҳасининг очиқ майдаланиб кетиши, қон томирлари ва нерв толаларининг узилиши, чап кафтнинг йиртилган жароҳати аниқланган. Ўнг қўл ва юз соҳаси куйиш жароҳатини олган. Шифокорлар чап қўл кафтини кесиб ташлашга мажбур бўлишган.
Шифокорнинг таъкидлашича, декабрь ва январь ойларида бу каби ҳолатлар сони ортади. Кўп ҳолларда оқибатлар оғир ва қайта тиклаб бўлмас даражада бўлади — куйишдан ташқари, суяклар синиши, қўл, юз ва кўзларнинг шикастланиши кузатилади.
ИИББ ота-оналарни фарзандларининг пиротехника воситаларидан фойдаланишига йўл қўймасликка чақирди.
Яқинда Ўзбекистон Божхона қўмитаси йил бошидан буён 136 та ҳолатда 7,35 миллиондан ортиқ пиротехника буюмлари мусодара қилинганини хабар қилган эди. Ушбу маҳсулотларни олиб кириш ва сотиш тақиқланганига қарамай, ҳар йили Янги йил байрамида ҳамма ерда мушакбозлик ва петардалар овози эшитилади.
