Перу Конгресси 2026 йил 17 февраль куни коррупция ва мансаб ваколатини суиистеъмол қилиш бўйича тергов қилинаётган муваққат президент Хосе Херини лавозимидан четлатиш учун овоз берди. Ушбу қарор сайловларга икки ойдан кам вақт қолганда қабул қилинди, деб хабар бермоқда Associated Press.
Херининг истеъфоси учун 75 нафар депутат овоз берди, 24 нафари қарши чиқди, уч киши эса бетараф қолди.
Хери лавозимда тўрт ойдан сал кўпроқ — 2025 йил 10 октябрдан бери ишлаб келаётган эди. У шахсий бойлик орттириш ва норозилик намойишларини бостиришда айбланиб лавозимидан четлатилган Дина Болуарте ўрнини эгаллаган эди.
Херига нисбатан тергов ишлари декабрь ойида икки нафар хитойлик тадбиркор билан ўтказилган норасмий учрашув ҳақидаги маълумотлар сизиб чиққанидан кейин бошланди. Улардан бири амалдаги давлат шартномаларига эга, иккинчиси эса ўрмонларни ноқонуний кесиш иши бўйича айбланмоқда.
Хери айбловларни рад этиб, учрашув Перу-Хитой байрамига тайёргарлик кўриш билан боғлиқ бўлганини даъво қилмоқда. Бироқ мухолифат уни коррупцияда айбламоқда.
Херининг четлатилиши Перуда 2016 йилдан бери 7 та президент алмашган узоқ давом этаётган сиёсий инқирознинг навбатдаги эпизоди бўлди, деб қайд этади AP.
Парламент депутатлар орасидан янги муваққат президентни танлаши керак. У 28 июлгача вазифасини бажариб туради, шундан сўнг ҳокимиятни 12 апрелдаги сайловлар ғолибига топширади. Херининг ўзи эса жорий чақириқ ваколатлари тугагунга қадар Конгрессдаги ишига қайтади.
Сўнгги ўн йилликда Перу парламенти ижро этувчи ҳокимиятга нисбатан катта таъсирга эга бўлди, деб тушунтиради AP. Перу конституциясидаги банд президентларни, агар улар мамлакатни бошқаришга «маънавий жиҳатдан лаёқатсиз» деб топилса, лавозимидан четлатиш имконини беради. Депутатлар ушбу бандни кенг талқин қилишади ва Конгрессда кўпчилик овозини шакллантира олмаган президентларни истеъфога чиқариш учун ундан қайта-қайта фойдаланишган.