Ўзбекистон Республикаси Олий Мажлиси Қонунчилик палатаси депутати, «Миллий тикланиш» демократик партияси фракцияси аъзоси Дилноза Азизова болаларга нисбатан жинсий зўравонлик учун жазони кучайтиришни таклиф этди. Депутатнинг бу баёнотига Наманган вилоятида юз берган яқиндаги воқеа сабаб бўлди.
Эслатиб ўтамиз, Янгиқўрғон туманида 38 ёшли эркак 7 ёшли қариндошини зўрлаганди. Уни икки кундан сўнг топиб, ҳибсга олишди. У аввал ҳам худди шундай жиноятлар учун 2 марта судланган, аммо ҳар икки сафар жазонинг бир қисмини ўтаганидан сўнг озодликдан маҳрум этиш жазоси ишлаб беришга алмаштирилган.
«Намангандаги воқеа — бу фақатгина битта педофилнинг ғаразли иши эмас, балки йиллар давомида шундай жиноятларни енгил иборалар билан оқлаб келган тизимнинг юзидир… Бола ҳаёти билан ўйнашиб бўлмайди. Бу оддий жиноят эмас — бу инсониятга қарши қилинган ҳаракат. Педофилларга „яхши хулқ-атвори“ учун жазо муддатлари қисқартирилиши ва улар кўчаларда хотиржам юриши, давлатнинг болаларга бўлган муносабатини кўрсатади. Қонун нафақат қоғозда, балки ҳаётда ҳам қатъий бўлиши керак. Биз яна бир бор гувоҳ бўлдикки, бундай жиноятчилар учун на кечирим, на енгиллик, на „яхши хулқ-атвори“ учун имтиёз бўлиши мумкин эмас», — деб ёзди депутат.
Депутат Жиноят кодексига киритилган ўзгартишларни эслатиб ўтдики, унга кўра, жазонинг қолган қисмини енгилроқ жазога алмаштириш 18 ёшга тўлмаган жабрланувчига нисбатан зўрлаш ёки ўзгача жинсий алоқа қилишда айбдор бўлган шахсларга нисбатан қўлланилмайди.
У шунингдек, ҳар бир шундай ҳолат «болалар — миллат келажаги» деган тез-тез такрорланадиган даъвони рад этишини таъкидлади. Унинг сўзларига кўра, агар жамият педофилларга нисбатан ҳозиргидек бағрикенглик кўрсатишда давом этса, бу ўз келажагини ўз қўли билан барбод қилаётганини англатади.
«Талабим қатъий: болаларга нисбатан ҳар қандай шаклдаги жинсий зўравонлик учун қонунчилик даражасида умрбод озодликдан маҳрум қилиш жазосини белгилаш вақти келди», — дея таъкидлади Дилноза Азизова.
2025 йил октябрь ойи бошида Қирғизистон президенти Содир Жапаров ҳам худди шундай жиноятлар учун жазони тубдан кучайтириш ҳақида фикр билдирган эди. У, хусусан, мамлакатда болалар ва аёлларга қарши жиноятлар учун ўлим жазосини қайтариш таклифини илгари сурди. Бу 17 ёшли мактаб ўқувчисини зўрлаш ва ўлдириш билан боғлиқ оммалашган ишдан сўнг содир бўлди. Бир қатор ҳуқуқ ҳимоячилари бу ташаббусга қарши чиқишмоқда, бунинг сабаби сифатида суд тизимининг такомиллашмаганлиги ва мамлакатда ДНК тестлари ўтказилмаётгани сабабли хато ҳукм чиқарилиши мумкинлигини кўрсатишмоқда.
