Португалиялик мураббий Паулу Бенту Ўзбекистон миллий футбол терма жамоасини бошқариш таклифини рад этди. Бу ҳақда A Bola нашри хабар берди.
Манбага кўра, мутахассис «таклиф қилинган шартларни карьерасининг ҳозирги босқичидаги кутилмаларига мос келмайди» деб ҳисоблаган. O Jogo нашрининг қайд этишича, Бенту шахсан Ўзбекистон футбол федерацияси вакиллари билан учрашган, бироқ томонлар келиша олмаган.
Ўзбекистон аввалроқ АҚШ, Канада ва Мексикада бўлиб ўтадиган 2026 йилги жаҳон чемпионатининг финал босқичига йўл олган эди. Миллий терма жамоа ўз тарихида илк бор жаҳон чемпионатида иштирок этишини таъминлади.
Португалия (2010−2014), Жанубий Корея (2018−2022) ва Бирлашган Араб Амирликлари (2025 йил мартгача) терма жамоаларини бошқарган Паулу Бенту ҳозирда жамоасиз.
Португалия ОАВ, шунингдек, Бенту испаниялик Хосе Риверо ишдан бўшатилганидан сўнг мураббийликка номзод сифатида қаралаётган, мамлакатнинг амалдаги чемпиони Мисрнинг «Ал-Аҳли» клубининг шорт-листига киритилгани ҳақида хабар бермоқда. O Jogo нашрига кўра, Миср клуби Бенту билан дастлабки музокараларни ўтказиб бўлган.
Аввалроқ «Ал-Аҳли» Жозе Моуриньонинг номи билан ҳам боғланган эди, бироқ ОАВга кўра, у таклифни рад этган.
Бугунги кунда Ўзбекистон терма жамоасини Тимур Кападзе бошқармоқда. Жамоа унинг бошчилигида Марказий Осиё футбол ассоциацияси (CAFA) томонидан ташкил этилган CAFA Nations Cup 2025 турнирида иштирок этмоқда. Мусобақа 29 августдан 8 сентябргача бўлиб ўтади. Гуруҳ босқичи ўйинлари Ўзбекистон ва Тожикистон стадионларида, финал учрашуви эса Ўзбекистонда бўлиб ўтади.
Эслатиб ўтамиз, Ўзбекистон ўз гуруҳида 7 очко тўплаган ҳолда биринчи ўринни эгаллади ва финалда Эронга қарши 2025 йил 8 сентябрь куни майдонга тушади.
