Ўзбекистон Президенти Шавкат Мирзиёевга маҳаллаларни ишсизлик ва қашшоқликдан холи ҳудудга айлантириш, аҳоли бандлигини таъминлаш чора-тадбирлари тўғрисида маълумот тақдим этилди, дея хабар берди давлат раҳбари матбуот хизмати.
Йиғилишда бугунги кунда маҳалла «еттилиги» аъзолари ишининг самарадорлигини баҳолашнинг аниқ мезонлари мавжуд эмаслиги қайд этилди ва уларнинг асосий вазифа — ишсизлик ва қашшоқликни қисқартириш бўйича масъулиятини ошириш зарурлиги таъкидланди.
Президент «еттилик» фаолияти аҳоли бандлиги ва даромадларининг ўсишида бевосита акс этиши кераклигини, бу йўналишдаги ишлар янада манзилли ва натижага йўналтирилган бўлиши лозимлигини таъкидлади.
Давлат раҳбари маҳаллалар муаммоларини ва уларнинг «ўсиш нуқталарини» аниқлаш, тизимли чора-тадбирларни ишлаб чиқиш ва амалга ошириш, фуқароларнинг мурожаатларини бевосита жойларда ҳал этишга алоҳида эътибор қаратиш бўйича топшириқ берди.
Энг муаммоли маҳаллалардаги ишларнинг ҳолати кўриб чиқилди. Бундай ҳудудларга алоҳида эътибор қаратиш, инфратузилма, электр таъминоти, интернетга кириш имкониятини кенгайтириш, шунингдек, томорқалардан фойдаланиш имкониятларини ошириш вазифаси қўйилди.
2025 йил охиригача қашшоқлик даражаси йил бошидаги 8,9 фоиздан 6 фоизгача пасайиши кутилаётгани қайд этилди. Келгуси йил учун бу кўрсаткични 4,5 фоизгача камайтириш мақсади белгиланди.
Ушбу мақсадларга эришиш учун маҳаллаларда ишларни комплекс ташкил этиш бўйича вазифалар белгиланди: барқарор бандликка қаратилган хизматлар қамровини кенгайтириш, даромад манбаларини яратиш, аҳолини касб-ҳунарга ўқитиш ва тадбиркорлик фаолиятига жалб этиш.
Ҳар бир кам таъминланган оила учун унинг реал имкониятлари ва эҳтиёжларидан келиб чиққан ҳолда индивидуал дастурлар шакллантирилиши зарурлиги алоҳида таъкидланди.
Лойиҳа ёндашуви доирасида «Бандлик органларининг иш берувчилар билан ҳамкорлиги», «Тенг имкониятлар — инклюзив бандлик», «Барқарор келажак сари», «20 та маҳаллий бренд», «Бир контур — бир маҳсулот», «Маҳаллаларда тадбиркорликни ривожлантириш», «Ижарага берилган ерлар ва томорқаларни суғоришни яхшилаш», «Эски боғларни янгилаш», «1000 гектар мевали боғлар», «Экспорт кооперативлари» ва бошқа дастурлар орқали 1 миллион кам таъминланган фуқарони қамраб олиш кўзда тутилган.
Қашшоқлик ва ишсизликни маҳаллаларда кичик ва ўрта лойиҳаларни амалга ошириш, жумладан, чегараолди ва анклав ҳудудларда инфратузилмани ривожлантириш, кеча-кундуз ишлайдиган кўчалар, туристик маҳаллалар, саноат микромарказларини яратиш, соҳил бўйи ва йўл инфратузилмасини ривожлантириш орқали камайтириш чоралари тақдим этилди.
2025 йилги бандлик дастурининг амалга оширилиши, 2026 йил учун режа шакллантирилиши ва норасмий бандликни қисқартириш масалалари кўриб чиқилди.
Президент масъул тузилмаларга вазифаларни жойларда манзилли ҳал этишни, аҳолининг реал эҳтиёжларини ҳисобга олган ҳолда иш самарадорлигини оширишни, шунингдек, ишсизлик ва қашшоқликни қисқартириш бўйича вазифаларни бажаришда юқори даражадаги масъулиятга эришишни топширди.
